Milio’l del Nido presenta ‘¡Y qué quies, si tengo oreyes!’

Milio’l del Nido va presentar esta tarde, a les siete, nel Aula Abierta de la Llibrería Asturiana Trabe, el so últimu llibru ‘¡Y que quies, si tengo oreyes!’. Venti cuentos recoyíos nun mesmu volume, caún d’ellos acompañáu por un refrán, una copla popular y una cosadiella, elementos fundamentales na cultura popular asturiana, qu’abren y piesllen caúna de les narraciones del llibru.

La vocación de contador de cuentos de Milio’l del Nido (Uvieu, 1944), enraigonáu na tradición oral, llevalu a axuntar relatos de diferentes cultures y tradiciones adaptándolos a l’Asturies de güei o a la del pasáu.

Amante del folclore y de les tradiciones, formó en 1974 el Grupu Los Urogallos que, años depues, se fusionó col Colectivu Riscar pa terminar surdiendo d’ello l’Andecha Folklor d’Uvieu. Como contador de cuentos, Milio’l del Nido tien percorrío tola Península Iberica cuando solu, cuando en compañía de Manolo de la Caben, xunto al que grabó una cinta con dalgunes d’eses histories. Amás, col folkorista Fernando de la Puente Hevia caltien la Danza Prima na Plaza’l Paragües d’Uvieu.

Depues del esitu de ‘Contáronmelo pa que lo contara’ (Trabe, 2001) Milio presenta esti nuevu volume cuentos esta tarde, a les siete, nel Aula Abierta de la Llibrería Asturiana Trabe. Nel actu, l’autor va cuntar dalgún de los sos meyores cuentos, narraos col so peculiar estilu que lu ta llevando a los llugares más insospechaos de la península, contando siempre n’asturiano.