Miles de persones acudieron a Mieres pa participar nos actos oficiales del 8 de Setiembre

Música, teatru, mercáu, sidre de baldre. Mieres convirtióse güei nuna gran folixa cola llegada de miles de persones que se desplazaron a la villa minera pa participar nos actos entamaos pol Gobiernu’l Principáu pa conmemorar el Día d’Asturies. Depués d’acusaciones cruzaes y d’una rectificación ‘in extremis’ por parte l’Executivu, la llingua asturiana pasó a la fin inalvertida nos cartelos ya inscripciones institucionales allugaos na ciudá.

A lo menos asina quedó asoleyao nos cartelos de formatu cuadráu qu’anunciaben perdayures la cellebración y que na so mayoría colingaben de les faroles. Toos ellos taben en castellán, lo mesmo que la propaganda institucional que los propietarios de pequeños comercios de la villa minera asitiaron nos sos escaparates p’anunciar los actos festivos del 8 de Setiembre, y que les inscripciones na plaza de La Pasera, onde se publicitaba con profusión una ‘degustación de sidra’.

Esa espicha de sidra de baldre concentró a gran parte de los visitantes na tarde de güei, anque’l públicu desfiló tamién en grandes cantidaes pol mercáu astur allugáu nos xardinos del Ayuntamientu. Artesanía, llambionaes y una amuesa d’aves rapaces centraron l’atención de los visitantes.

Na vieya estación del Vasco, un concursu de postiaores foi siguíu asinamesmo por abondu públicu, mientres qu’un cuartu escenariu festivu, la emblemática plaza de Requexu, acoyó un conciertu de La Bandina’l Tombo y Liliana Castañón Cuartetu. Con música se peslló tamién la xornada, nun recital nel parque Xovellanos compartíu poles bandes Los Ciquitrinos y La Bottine Souriante.