Migoya: “Ye una obviedá que l’asturianu tará presente na radio y na televisión autonómiques”

“Ye una obviedá que l’asturianu va tar presente na televisión y na radio autonómiques”, nos términos y proporción que marque’l conseyu d’alministración del ente. Asina lo aseguró esta mañana la conseyera de Cultura, Comunicación Social y Turismu, Ana Rosa Migoya, na presentación n’Uviéu de dos cursos d’asturianu pa periodistes entamaos pol Principáu y la Universidá d’Uviéu y que na primer hora’l plazu de matriculación rexistraron 15 inscripciones pa les 35 places disponibles.

Nuna intervención dafechu en llingua asturiana, Migoya tildó de “impensable” el fechu de qu’esi idioma puea espoxigar ensin tener una presencia afayadiza na prensa escrita, radio ya internet, y “pa ello faen falta profesionales” capaces d’emplegar l’asturianu de forma adecuada.

Magar d’ello, la conseyera nun concretó si’l títulu que recibirán los participantes nos dos cursos d’Estensión Universitaria sedrá o non consideráu especialmente na esbilla de la plantiella de periodistes qu’entrarán a trabayar nel futuru ente públicu de comunicación. Migoya dexó entever qu’esi ye’l “deseyu” de la Conseyería, pero refugó precisar más allá d’una frase xenérica: Los títulos tendrán “la mesma validez p’acceder a la tv autonómica que p’acceder a otros medios de comunicación”.

Nuna andecha pionera ente la Conseyería de Cultura y la Universidá, güei quedó abiertu’l plazu de matrícula pal primeru de los cursos, un monográficu de primer nivel de llingua asturiana nel ámbitu de la información y la comunicación que va desendolcase ente’l 1 d’ochobre y el 13 de payares n’Uviéu y Xixón.

El director d’esti cursu, Xulio Viejo, felicitóse de les posibilidaes que la doble ufierta formativa abre pa difundir l’usu de l’asturianu “en niveles de dignidá afayadizos”, n’especial nun contestu enrarecíu, señaló, nel que los profesores de Llingua siéntense delles vegaes como si enseñaren Llatín, una llingua con escasa presencia cotidiana.

El segundu de los cursos, especializáu en comunicación audiovisual en situaciones de minorización llingüística, cellebraráse del 26 de payares al 22 de xineru -con matrícula a partir del 29 d’ochobre- y tará dirixíu pol docente universitariu Xuan Busto. Ente’l profesoráu figuren, amás, el director d’Asturnews y docente na Universidá Carlos III de Madrid, Próspero Morán; y los profesores Emilio Fernández Peña y María José Cantalapiedra.

Los dos cursos d’Estensión Universitaria foron presentaos esti mediudía nel edificiu hestóricu de la Universidá, nun actu al qu’asistieron, amás de Migoya, Viejo y Busto, el director de la Oficina de Política Llingüística’l Principáu, Ramón D’Andrés; y la vicerrectora d’Estensión Universitaria, Paz Andrés. Esta última ufrió la “disposición másima” la Universidá p’afitar la enseñanza de la llingua asturiana.

La Universidá programa por primer vegada dos cursos especializaos de llingua asturiana pa periodistes