Migoya obvia nel Senáu los documentos asturianos de Salamanca y defende la devolución a Cataluña

Defendió la devolución de documentos a Cataluña, pero obvió la restitución de los ‘papeles’ asturianos. La Conseyera de Cultura’l Principáu, Ana Rosa Migoya, avaló ayeri nel Senáu el regresu de la documentación sobro la Guerra Civil reclamada pola Generalitat, nuna intervención qu’Izquierda Asturiana tilda de “surrealista” por afitar a los asturianos como “ciudadanos de segunda”.

Migoya, que participó na comisión de Comunidaes Autónomes de la Cámara Alta, centró bona parte’l so discursu en defender les tesis del Gobiernu central, que devolverá a Cataluña la documentación incautada na Guerra Civil pol bandu franquista y llueu depositada nel archivu de Salamanca. Nesi sen, la conseyera acusó al PP -promotor de la sesión d’ayeri nel Senáu- d’usar la cuestión pa sacar rentabilidá electoral y refugó abrir un alderique estatal -tamién propuestu pol PP- sobro la xunidá’l patrimoniu.

“Nun considero qu’esista un debate sobro’l repartu de competencies na estaya archivística ente l’Estáu y les comunidaes, más allá del que se quiera utilizar demagóxica y partidariamente”, sentenció Ana Rosa Migoya, qu’amás sofitó les pretensiones del Ministeriu de Cultura de crear un gran archivu centralizáu de la Guerra Civil que complete los fondos de Salamanca con otros nuevos.

Nel discursu de Migoya, qu’evitó dafechu entrar na posible vuelta al Principáu de la documentación asturiana custodiada en Salamanca, Izquierda Asturiana ve una “monumental burlla” a los ciudadanos y la ratificación de que los asturianos son “de segunda col aplausu’l Gobiernu”, yá que la conseyera defende pa Cataluña lo qu’arrenuncia a pidir pa la so propia comunidá autónoma.

El pasáu 23 d’avientu, un grupu de 17 hestoriadores, archiveros, intelectuales y xuristes encamentó, con 14 votos a favor y tres abstenciones, la devolución a Cataluña de los documentos catalanes custodiaos nel Archivu de la Guerra Civil, en Salamanca, nun informe que nun tenía calter vinculante pero que determinó la decisión final del Ministeriu de Cultura de facer efectiva esa devolución.

Nel casu d’Asturies, que cuenta con cientos de caxes de documentación nel fondu allugáu en Salamanca, tolos partíos políticos con representación parllamentaria na Xunta Xeneral refugaron yá reclamar con claridá la restitución d’esos documentos al Principáu, bien porque la microfilmación de los ‘papeles’ asturianos permite anguaño una consulta afayadiza con independencia l’allugamientu de los orixinales, por defender la integridá del archivu, o bien apelando a la prudencia.