Meryl Streep llanzó dardos a Donald Trump nel so discursu nos Globos d’Oru

El discursu de Meryl Streep foi unu de los grandes momentos na tibia y aburrida gala de los Globos d’Oru. La oscarizada actriz qu’interpretó a la Dama de Fierro recibió’l premiu honoríficu Cecil B. DeMille por tola so carrera, anque a la de ponese delantre del micrófonu aprovechó pa criticar al presidente electu Donald Trump.

“Tolos que tamos nesta sala pertenecemos a dos de los sectores más vilipendiados, estranxeros y prensa”, empezó con enerxía Meryl Streep. Emponderó’l cosmopolitismu del cine, repasando rápido a dalgunos de los actores que nacieron fora d’Estaos Xuníos. A lo qu’amestó que Hollywood “ta llenu d’estranxeros, de foresteros”.

“L’únicu trabayu d’un actor ye sacar a la lluz la vida de persones distintes (…) Si espulsen a los estranxeros solo vamos ver fútbol y artes marciales”, aseguró antes de dicir que “la falta de respetu va provocar más falta de respetu. La violencia convida a la violencia”, en clara alusión al discursu en contra de la inmigración de Donald Trump.