Mediu millar d’escolinos de venti colexos tán en cuarentena n’Asturies

Tres de la segunda selmana de clases n’Infantil y Primaria y la primera pa Secundaria, Bachilleratu y Formación Profesional y mediu millar d’escolinos y escolines d’una ventena de colexos tán o tuvieron en cuarentena por cuenta de casos positivos confirmaos ente alumnáu, profesoráu o personal del comedor.

Son datos non oficiales, yá que enagora nun hai información oficial de la Conseyería d’Educación, que ta trabayando, al pie de la de Salú, nel sistema pa datar les andaes oldeaes nos centros educativos. Los datos que tescendieron fueron confirmaos polos mesmos directores de los colexos o, nel so casu, les families. Xixón ye’l conceyu con mayor númberu de positivos en colexos: ocho tienen aules en cuarentena, inclusive hai dalgunu con más d’una afectada. Tuvieron que poner yá en marcha los sos protocolos covid los colexos Evaristo Valle, Montedeva, Príncipe d’Asturies, Virxe Reina, Codema, Patronato San José, Federico García Lorca y Alfonso Camín.

N’Uviéu hai casos nel colexu Parque Infantil, el Nazaret y el Novo Mier. N’Avilés, nel San Nicolás de Bari y el Paula Frasinetti. Tamién en Cancienes, Corvera, nel Francisco Fernández González. El mapa de positivos pasa polos CRA de Campumanes y Pintor Álvaro Delgado de Valdés, l’Alejandro Casona de Cangas, el Rei Aurelio de Sotrondio y trés centros de Siero: Arregui, El Carbayu y el Santa Bárbara de Llugones. Tamién Villaviciosa y Quintes. Amás, tuvieron cerraes les dos escueles infantiles de San Martín. Los colexos trabayen con grupos de convivencia estable, polo que foi abondo con aisllar les aules afectaes, ensin superar los 20 alumnos.

El balance de les dos primeres selmanes de clase inclúi’l malestar de centros y families con cuestiones como’l tresporte escolar. Esto foi lo que provocó la dimisión de la directiva del IES de Llanera. Finalmente, el problema solucionóse y llegaron a un alcuerdu cola conseyería. Van Siguir esti cursu, pero alverten: «Fai falta que venga daquién nuevu, más nuevu y con más espíritu», dicen, tres diez años al frente. Pero foi precisamente la so esperiencia lo que-yos animó a siguir un pocu más.

Per otru llau, Educación convocó’l programa Proa+, destináu al arriquecimientu educativu na situación d’emerxencia educativa del cursu 2020-21 provocada pola covid. Va Partir 1,5 millones ente los colexos qu’encaren «mayor complexidá educativa».