L’Atenéu acueye la presentación de ‘Cola suavidá del aire’ de Xosé Bolado

Esti miércoles, 15 de marzu, a les 19 hores, nel Salón d’Actos de la Escuela de Comerciu (Cai Francisco Tomás y Valiente, 1), l’Atenéu Obreru de Xixón y la Editorial Impronta organicen la presentación del llibru Cola suavidá del aire [Poesía], de Xosé Bolado.

Nel actu intervienen Carlos González Espina, Pablo Antón Marín Estrada y José Luis Argüelles, editor y autores de prólogu y epílogu. Darréu tendrá llugar una llectura poética.

Con esta edición de la poesía completa n’asturiano de Xosé Bolado bríndase a los llectores la posibilidá de revisitar, percorrer o somorguiase con gustu y sosiegu nel llabor vivu d’un autor universal que quixo mandase de la so llingua acorralada, por dexar lo meyor del so talentu y compromisu estéticu nes manes d’esos pocos o munchos cómplices pa los qu’escribió, cola voz amiga de los secretos perdurables, pallabres mayores y verdaderes. Equí queden, xuntos y llimpios, tolos poemes n’asturiano que conocemos de Xosé Bolado: los de los dos llibros que-y publicó Llibros del Pexe —Conxura contra la decadencia (2002) y Na estación de los relevos (2006)— y el que salió n’Impronta —La bona intención (2012)—. «Otros poemes» axunta los inéditos, o los espardíos per revistes, qu’atroparon José Luis Argüelles pa Toma de tierra (2010) y Esther Muntañola pa Un pájaro tan ligero (2021). La secuencia «cola suavidá del aire» apaez en dos poemes diferentes de Na estación de los relevos. A los editores prestó-yos rescatala pa titular el conxuntu porque-yos abultaba una bona manera de describir l’estilu que siempre gastó —pa escribir y pa vivir— el so autor.