María Luz Cristóbal Caunedo recibe’l XI Distintivu Fini Suárez a la investigación folklórica

La cantante de tonada María Luz Cristóbal Caunedo foi la ganadora del XI Distintivu a la Investigación folklórica “Fini Suárez”, un premiu que recuerda la memoria de la reconocida folclorista mierense y que s’enmarca dientro de los actos culturales de la Folixa na Primavera de Mieres, cita que se va celebrar esta selmana, los díes 8, 9 y 10 d’abril, un escaparate internacional de les músiques que se faen nel Arcu Atlánticu.

María Luz Cristóbal Caunedo, de Máñules (Tinéu), ye cantante de tonada, autodidacta, con una llarga trayectoria nel mundu del cantar asturianu. Ente los argumentos pa la so elección, que fecha con unanimidá per parte del xuráu, tán la gran calidá del so trabayu, con un absolutu respetu al estilu tradicional que supo xunir coles renovaciones que nos postreros 25 años vienen dándose nel panorama musical asturianu xeneral. Ye una de les protagonistes del averamientu ente la xeneración más veterana, representada por ella, y otra más nueva onde tán presentes los músicos y arreglistes más actuales. Ganadora de los principales concursos de cantar asturianu y con un llargu percorríu d’actuaciones, del so trabayu discográficu como solista destaquen en particular trés grabaciones: “Misa asturiana de gaita” (1998), “El gaiteru de veriña” y “Onde la ñublina posa” (1999), discu que se convertiría nuna referencia imprescindible polo que supunxo d’actualización de la tonada y onde la acompañen bona parte de los meyores músicos tradicionales asturianos. La so última grabación ye “Cantar de Seronda” (2005). Ta integrada nel Coleutivu de Música Tradicional “Muyeres” dende la so fundación, y grabó con elles tamién cuatro trabayos discográficos.

El Distintivu va apurríse-y a Cristóbal Caunedo coincidiendo col pregón de la Folixa na primavera, mañana, vienres 8 d’abril, nel parque Xovellanos de Mieres.