Manuel García “Galano” primer escritor na fala que va recibir el Premiu Timón

L’Asociación Cultural L’Arribada, ta acabante dar a conocer el fallu del xuráu de la tercer edición del Premiu Timón, que convirtió a Manuel García “Galano” nel primer autor eonaviegu en facese col gallardón.

El xuráu, qu’aconceyó’l cuatro de setiembre, tuvo formáu por Alberto Álvarez Peña, Adolfo Camilo Díaz, Luis Casteleiro, Roberto Colunga, Antón García, Aurora García Rivas, Humberto Gonzali, Xosé Nel Riesgo, David M. Rivas y Xuan Xosé Sánchez Vicente y comentó del autor “el valir de la so trayectoria lliteraria y la so aportación a la cultura del occidente asturianu”.

Del ganador, ñacíu n’A Roda (Tapia) nel 1922, destracaron tamién “los sos importantes méritos lliterarios”, y “escribir na so fala cuando cuasimente naide nun lo facía; facer que la so xente participare naquél entós nuna cultura propio, implicándola nel teatru qu’escribió y que representaben los vecinos como aficionaos; ser un referente cultural, pero tamién un referente de bon facer y un entusiasta de la cultura d’esta fastera d’Asturies, como asina lo reconocieren l’Academia de la Llingua, el Principáu y el conceyu de Tapia; tener trabayao estremaos xéneros amás del teatru, como ye’l casu la poesía y la narrativa, amás de facer trabayos d’investigación como ye un vocabulariu, artículos de prensa, estudios sobre música, ente más otros; ser la persona más vieya del occidente que sigue escribiendo y que tien detrás una mui consideratible creación”.

La entrega del III Premiu Timón, consistente nuna pintura-cerámica del escultor xixonés Jesús Castañón, va facesee’l prósimu 26 de setiembre, sábadu, a les 20:00 hores, nel Salón d’Actos del CC Vieyu Institutu de Xixón, na Arribada 2009.