Maná llega güei a Xixón con un espectáculu musical de más de dos hores

Redacción.

Güei miercoles a les 22:30, el grupu mexicanu Maná va ofrecer un conciertu en Xixón. L’espectáculu va durar más de dos hores. L’Ayuntamientu de Xixón toma midíes especiales de seguridá al mesmu tiempu que refuercia los autobuses municipales con servicios especiales pa facilitar el retornu del numberosu públicu que s’espera va asistir al conciertu.

Unos 400.000 watios pa lluces, 200.000 watios pa soníu, 150.000 watios pa vídiu, 6 cañones de lluz, tres carretes elevadores y grua de 50 tonelaes pal montaxe del escenariu, amás de 12 trailers ( 9 pa producciones y 3 pa escenariu) con más de 100 persones trabayando, unes 70 del Teatru Xovellanos y 30 de xira col grupu conformen parte del montaxe pal espectáculu del grupu mexicanu.

Los trabayos previos entamaron el miercoles pasáu y a lo llargo de la selmana fueron instalándose les distintes infraestructures. 4 llinies ADSL y 6 analóxiques, tanques de CO2 pa los efectos especiales de confetti y un tanque con agua de 400 llitros. El dispositivu de seguridá va cuntar güei con 100 persones de seguridá privada y ente 80 y 100 persones de fuercies de seguridá, ente policia llocal, policia nacional, bomberos, proteccion civil y 3 puestos sanitarios y 2 ambulancies con medicu. Too preparao pa que los asturianos disfruten del cuartu conciertu de Maná na península.