Mamatayoe busca a les protagonistes del so próximu videu nun casting

Mamatayoe, marca asturiana de moda pa muyer, prepara la grabación d’unos de los sos vídeos pa la promoción internacional de la firma. El videu, que va rodase nesta ocasión n’Asturies, dempués de preparar los audiovisuales de promoción de les últimes colecciones en Barcelona, va dar vida a la colección “Sotto il Girasole della Toscana”. Pal rodaxe del videu Mamatayoe busca a tres muyeres con un casting que va celebrase na Escuela Superior d’Arte Dramáticu de Xixón.

La convocatoria ta abierta pa toles muyeres d’ente 20 y 35 años d’una talla alredor de la 38. La prueba va llevase a cabu nes instalaciones de la Escuela Superior d’Arte Dramáticu d’Asturies, asitiada en La Llaboral, ciudá de la cultura, el vienres 22, de 16 a 18 hores. Pa cualquier consulta, el Departamentu de Comunicación de Mamatayoe atiende na páxina de la marca en Facebook y Twitter.

Mamatayoe ye una marca de la empresa asturiana Comercializadora de Moda del Norte, que lleva más de veinte años nel mercáu. Dende va más d’una década la so internacionalización llevó a Mamatayoe a tar presente en más de trenta países d’Europa, América, Asia y Oceanía, siempres dende’l so llar central en Xixón.