L’autor Chechu García abre un nuevu taller de llectura infantil en Samartín del Rei Aurelio

Mañana vienres 22 de payares a les 6 de la tarde na Casona del Bravial de Blimea va tener llugar un nuevu taller de llectura infantil entamáu pola Oficina de Normalización Llingüística del conceyu en collaboración cola asociación cultural Bocina Nalón y la Oficina d’Información Xuvenil.

Si los dos vienres anteriores un grupu de neños d’ente 7 y 10 años s’acercaben al argumentu y el pallabreru del llibru “Tapín de Picupáu”, de Pablo Rodríguez Medina, esta selmana va ser otru grupu d’edaes ente 4 y 6 años los que van poder conocer en persona al escritor Chechu García, que-yos va cuntar el so llibru tituláu “Marta y el peludín de Carrandi” (Ámbitu). Amás de charrar col autor van facer distintes actividaes rellacionaes con esti llibru, ente les que s’incluyen manualidaes y dibuxos, too ello dende un enfoque llúdicu y d’entretenimientu. Chechu García dase a conocer como escritor en 1996 col llibru infantil “Vieyu Trasgu”, col qu’algamó’l primer premiu de “Llectures pa rapazos” de l’Academia de la Llingua. Nesi mesmu añu algama tamién el premiu Teodoro Cuesta de poesía col llibru tituláu “Les coraes de la roca”.

Tamién tien escrites distintes obres teatrales, rellatos curtios, antoloxíes, estudios sobre la historia del cómic y llibros infantiles. Ye ún de los fundadores de la tertulia lliteraria “Tom Malory” y el coordinador de la revista que surde d’ella. Estos talleres son una de les principales novedaes que presenten les Xornaes de Lliteratura Infantil y Xuvenil d’esti añu, y que se suma a les esposiciones y les representaciones teatrales que se tán celebrando nel conceyu a lo llargo del tol mes.