Lydia Espina toma’l relevu de Carmen Suárez al mandu d’Educación

Lydia Espina, actual directora xeneral de Planificación ya Infraestructures Educatives, va ser la nueva dende güei la nueva conseyera d’Educación. Asina lo anunció ya’l domingu, al traviés d’un comunicáu, el presidente del Principáu, Adrián Barbón, quien fixo coincidir esti anunciu colos años de tomar de posesión de los sos conseyeros.

Nel so comunicáu oficial, Barbón sorrayó’l trabayu, dedicación y compromisu de Carmen Suárez mientres estos dos años de llexislatura, que coincidieron con un períodu «especialmente duru y complexu, marcáu pola pandemia, “nel que se cometieron aciertos y erros, pero nel que se demostró qu’Asturies cunta con un sistema educativu públicu robustu y capaz d’encarar circunstancies extraordinariamente adverses”.

Respectu al periodu qu’agora empieza, Barbón señaló que la educación ye clave pa garantizar la imprescindible igualdá d’oportunidaes y fomentar la equidad y que’l sistema hai de ser capaz d’afaer la ufierta formativa a les necesidaes llaborales pa contribuyir al amenorgamientu del desempléu xuvenil. Por eso, l’oxetivu ye “avanzar escontra una mayor conexón ente formación y empléu pa poder encarar los importantes retos que supon un mercáu llaboral en tresformamientu pol impactu de la revolución tecnolóxica y el protagonismu de la innovación”.

Lydia Espina López (Villaviciosa, 1974) ye funcionaria de carrera del cuerpu de maestros dende 2016. Llicenciada en Filoloxía Inglesa pola Universidá de Salamanca, darréu llogró’l grau de maestra n’Educación Primaria. A lo llargo de la so trayectoria, exerció como maestra d’Infantil y Primaria y como profesora d’Inglés en diversos centros educativos asturianos. Dende xunetu de 2019 dirixía’l Colexu Públicu Montevil, de Xixón. Antes d’incorporase en febreru a la Conseyería d’Educación como directora xeneral de Planificación ya Infraestructures Educatives ocupaba la Conceyalía d’Educación, Cultura y Deporte del Conceyu de Villaviciosa.