Los universitarios que nun dexen grabar el so exame van considerase non presentaos

Esti miércoles, 13 de mayu, entama na Universidá d’Uviéu’l periodu d’exames probablemente más inusual de la hestoria de la institución y los universitarios que nun dexen grabar el so exame van considerase non presentaos.

Alumnáu y docentes enfréntense por primer vegada a la evaluación ‘online’. Más de 3.000 exames, según los últimos datos ufiertaos pol equipu rectoral, van tener llugar de forma telemática. Y hai que solucionar munches coses primero que llegue’l momentu: que’l sistema informáticu funcione y soporte la carga; que’l tipu de prueba tea adatado al mediu; que los docentes cunten coles garantíes necesaries pa evitar fraudes; que los estudiantes tengan medios y conexón pa poder realizar la prueba… Y tamién, que se cumpla la cada vez más esixente normativa de protección de datos.

La Universidá d’Uviéu yá resolvió les dubies con unes instrucciones feches públiques esta selamana que, ente otres coses, alvierte al alumnáu de que les sos pruebes tendrán de ser grabaes. Porque, en casu de que se nieguen, nun van ser evaluaos. El testu dexalo bien a les clares: “Los estudiantes gocien nos procesos d’evaluación non presencial de toles facultaes qu’integren el derechu fundamental a la protección de datos. Sicasí, la negativa d’un estudiante a ser supervisáu por aciu webcam o a ser grabáu, sacantes esistan causes que la xustifiquen, va equivalir al so inasistencia a la prueba y, arriendes d’ello, va ser calificáu como non presentáu”. Tan solo en casos escepcionales que tean debidamente xustificaos el vicerrectoráu va poder tomar otra decisión. La grabación puede realizase al traviés de webcams o dispositivos integraos en teléfonos móviles. Too, al amparu de «lo previsto nel artículu 6.1. y) del Reglamentu Xeneral de Protección de Datos Personales (RPDP) y colos precuros establecíos na normativa de protección de datos personales».

Yá alvirtiera’l rector, Santiago García Granda, de que los docentes tendríen pruebes, en casu de reclamaciones, pa demostrar si usárense métodos irregulares, esto ye, si copiárase. Toes eses cuestiones fadiaron dende’l principiu a los estudiantes, que consideraben que se-yos taba poniendo en dulda ensin motivu.

Les instrucciones de la Universidá d’Uviéu comprometen al profesoráu a guardar confidencialidá sobre los datos personales y a curiar les grabaciones. En principiu, van guardase hasta’l final del cursu siguiente, anque si hai reclamaciones tienen de permanecer hasta qu’éstes tean resueltes en firme. L’estudiante nun va poder pidir que se destruyan antes d’esos plazos.