Portada Educación Los titulaos del antigu ITAE piden la homologación de los sos estudios

Los titulaos del antigu ITAE piden la homologación de los sos estudios

by asturnet

L’asociación de titulaos del Institutu de Teatru y de les Artes Escéniques d’Asturies considera que’l colectivu al que representa ta discrimináu respective a otres comunidaes del estáu no tocante a la homologación de los sos estudios colos de l’actual Escuela Superior d’Arte Dramáticu. Nuna carta unviada a distintos representantes políticos los actores y actrices del antigu ITAE piden la igua de la so situación.

L’asociación qu’axunta a los titulaos que cursaron los sos estudios enantes de qu’estos tuvieran rangu d’escuela superior afirma qu’insituciones académiques asemeyaes d’otres comunidaes convaliden estes enseñances en casos análogos y piden que la Conseyería d’Educación del Principáu faga lo propio col so casu.

Va un mes los titulaos del antigu ITAE unviaron una carta al responsable d’Educación del gobiernu asturianu José Luis Iglesias Riopedre y a representantes de los distintos grupos políticos pa informalos de la so situación y solicita la igua de la mesma, ensin algamar una respuesta afirmativa hasta la fecha pa solventar el so casu. En palabres del voceru de l’asociación Toño Caamaño: “tol mundu ta d’alcuerdu pero naide fai nada por resolvelo”. Agora l’asociación quier dar a conocer la so problemática énte la opinión pública énte lo que consideren “una petición urxente, xusta y lóxica”.

Tamién te podria gustar