Los rectores de les públiques afirmen qu’hai privaes que nun merecen el títulu de «Universidá»

El Conseyu de Rectores de les Universidaes Españoles (CRUE) asegura que n’España hai universidaes privaes que nun merecen tal títulu, el de «Universidá» porque «nelles nun s’investiga nin s’invierte n’investigación y, por ello, nun tendríen de llamar se universidaes porque esti conceutu implica docencia ya investigación calidable».

Asina s’espresó esti xueves pasáu’l presidente de CRUE y rector de la Universidá de Córdoba, José Carlos Gómez, que presidió en Toledo la xunta de l’Asamblea Xeneral d’esta organización. «El bancia ente universidaes públiques y privaes habría que centralo ende y non na simple esistencia de les privaes», añedió.

Nesti alcuentru, los rectores encetaron el futuru de les instituciones académiques y reclamaron más «permeabilidá» nel sistema educativu ente les universidaes y los centros de Formación Profesional (FP). «Tenemos estudiantes qu’abandonaron la universidá en primeru o segundu cursu y cólense a la FP pero nun se-yos reconocen esos años, lo que xenera frustración y déxa-yos ensin salíes y esto ye competencia del Gobiernu central», indicó al respeutu el presidente de CRUE. Al Gobiernu tamién reclamen los rectores «más flexibilidá nel marcu normativu p’acabar col corsé a la de contratar profesores o investigar» y relaxar los requisitos pa llograr una beca «porque se ta poniendo en riesgu la escalera d’ascensu social al traviés de los estudios». Tocantes a los gobiernos autonómicos, esixen dotación presupuestaria pa les universidaes públiques de los sos territorios «yá que hai universidaes qu’apenes tienen financiamientu pa pagar les nómines de los sos trabayadores».

De cara al futuru, los máximos responsables de les universidaes reconocen la so esmolición pola estructura d’escesives pymes y micropymes de la economía española que torga que estudiante bien formaos puedan trabayar «porque estes pequenes empreses nun pueden absorbelos». Tamién suxuren dotar d’una visión xeneral de la sociedá» a les titulaciones de tala forma que les disciplines d’humanidaes incluyan conteníos sobro tecnoloxía y les carreres técniques asuman asignatures como filosofía.