Los opositores d’Educación esperen la convocatoria de 2023

Ta previstu qu’en xunu de 2023 haya oposiciones d’Educación n’Asturies y que sían del cuerpu de Secundaria pero los opositores entá nun saben de la convocatoria y los sindicatos lleven selmanes pidiendo finar pa cola incertidume xeneral.

En concretu, les oposiciones de Secundaria previstes sonlo pa cubrir 519 places, que ye lo aprobao na Ufierta d’Empléu Públicu. Eso yera, siquier, lo esperao, hasta qu’entró en xuegu’l procesu de estabilización, que nel casu del sector eductivo p’Asturies inclúi 1.562 places, de les que la mayoría, 1.328, van ser por concursu oposición y el restu, 234, por concursu de méritos.

La cuestión ye que les oposiciones de reposición (les habituales) nun son iguales que les de estabilización (coles pruebes non eliminatories), polo que los aspirantes tienen de saber con anterioridá a qué procesu s’enfrenten.

Per otru llau, la mayoría de les comunidaes alcordaron convocar el mesmu cuerpu al empar y, enagora, nun s’algamó nengún alcuerdu. Coles mesmes, nesti momentu nun ta claro qu’en 2023 vaiga haber oposiciones de Secundaria o de Primaria y, nel casu de que sían de Secundaria, si van ser de reposición o de estabilización. Podría dase el casu tamién que se convocaren los dos cuerpos. Los sindicatos de la enseñanza lleven reclamando nes últimes selmanes a la conseyería qu’esclarie lo más llueu estes cuestiones, pa finar cola incertidume de el opositores.

Nel últimu alcuentru ente conseyería y sindicatos falóse tamién de los cambeos que se tienen qu’introducir na normativa de los concursos de tresllaos. Una sentencia del Tribunal Supremu publicada apocayá reconoz el derechu de los funcionarios de contabilizar los cursos que trabayaron como interinos tocantes a la suma d’años d’esperiencia, según los cargos desempeñaos antes de consiguir la plaza.