Los músicos asturianos aportaron esti vienres primeru d’agostu a Lorient

La delegación asturiana que va participar dende esti vienres hasta’l domingu 10 d’agostu nel Festival Intercélticu de Lorient entamó viaxe a les 10 de la nueche d’esti xueves 31 de xunetu con bandes como Ciquitrinos, les pandereteres de Dulcamara, Escontra y les bandes de gaites de Corvera y La Reina del Truébano como representantes. La delegación salió de la Plaza la Xesta d’Uviéu como ye tradicional y va aportar a Lorient pa xintar y disfrutar de les primeres actuaciones del festival.

Los dos autobuses de que se compón la delegación viaxen práuticamente enllenos, coles Bandes de gaites nún d’ellos y les demás agrupaciones y la prensa nel otru. Como tolos años, la collación foi enforma bultable y la gayola inundó los autobuses dende los primeros kilómetros d’una nueche llarga que se va prollongar hasta’l mediudía en que ta previsto qu’aporten a Lorient.

Asturnews ufre como tolos años una galería coles fotos de la xida de la delegación que tamién puen seguise na web de Flickr na que se allugarán les fotos diaries del festival o nel Canal de You Tube qu’Asturnews dedica al Festival de Lorient.

El primer día del Festival Intercélticu de Lorient arranca davezu con una completa xornada na que se van poer degustar los más típicos pexes de la Bretaña, mentantu actúen delles de les bandes qu’esti añu amenicen la selmana. A les 20.00 hores, en Port de Páche, dase’l pistoletazu al Festival 2008 con una xinta popular xunta la mar y a partir de les 22 hores nel Espace Marine, podrá disfrutase de los Celtas Cortos.

Como ya persaben los nuesos llectores, el Festival Intercélticu de Lorient cellebra esti añu, del 1 al 10 d’agostu, la edición númberu 38 con una importante representación asturiana de la mano de bandes como Ciquitrinos, les pandereteres de Dulcamara, Escontra y les bandes de gaites de Corvera y La Reina del Truébano. Amás el festival que dirixe Lisandro Lombardía va cuntar cola presencia de nomes consagraos de la musica celta como Lorena Mc Kennit, Moving Hearts o The Chieftains o grupos averaos a la escena como Celtas Cortos, Idir o Les Balkaniks.