Los escritores de l’Arribada lleguen esti sábadu al puertu deportivu de Xixón

L’Arribada entama la so primer fin de selmana d’actividaes con dos xornaes dedicaes al cine y los homenaxes a dellos autores y descansando’l domingu. El vienres, a les seis y media celénbrase na sala de conferencies del Vieyu Institutu de Xixón una tertulia sobre “El mitu de Prometéu nel cine”, con Chus Parrado, Alberto Álvarez Peña, David M. Rivas ya Illán Gonzali.

Darréu, nel mesmu llugar, va proyectase “Eraserhead / Cabeza esborradora”, sotitulada n’asturianu.

El sábadu, día 19, a partir de les 17,00 hores va producise l’Arribada de los escritores al Puertu Deportivu de Xixón (El Muelle), que se venía faciendo na primer xornada d’actividaes hasta agora. A les 17,30 va inaugurase oficialemente l’Arribada 2009, cola presencia de los políticos y esritores, que van presenciar el documental “L’últimu chalgueiru” y un homenaxe a Nené Losada Rico.

La xornada piésllase cola presentación de los llibros Premios “Nené Losada”, espublizaos pola Editorial Universos.