Los colexos van tener comedor y tresporte y prepárense pa grupos de 20 alumnos

Los colexos van tener comedor y tresporte y prepárense pa establecer grupos de 20 alumnos, sigún los primeros apuntes que se coocern de los planes de la Conseyería d’Educación que va analizar la propuesta de crear «agrupaciones convivenciales» d’ente 15 y 20 alumnos hasta cuartu de Primaria.

Si hai solo unos díes falábase de les dificultaes que tendría’l próximu cursu, con veces rotatories, aules de 15 alumnos y clases con mázcaros, l’horizonte ye agora más afayadizu. La ministra Isabel Celaá confirmó a finales de la selmana na Conferencia Sectorial lo qu’el so equipu adelantrara’l miércoles: que se relaxaben les midíes, que la mayor parte del alumnáu va poder allegar a les aules de forma presencial ya inclusive que nun va ser necesariu, o siquier non en toles circunstancies, l’usu de los mázcaros. El ministeriu llogró un alcuerdu xeneral coles comunidaes autónomes, con dos esceiciones: Madrid y País Vascu. Anque l’alcuerdu sía solo de mínimos y munches cuestiones queden en manos de cada comunidá.

Asturies asume les directrices nacionales y fai apueste por que’l cursu 2020-2021 pueda empezar con «la máxima asistencia posible a les aules en tolos centros y niveles educativos». Esto ye, va tratase de que la mayor parte de los alumnos puedan allegar la mayor parte del tiempu. Pa ello, la conseyera dixo que se van afaer tolos espacios disponibles nos centros pa garantizar la seguridá d’alumnáu y profesoráu».

Al pie de too eso, Asturies va estudiar otra propuesta importante: la posibilidá d’establecer «agrupaciones convivenciales» d’ente 15 y 20 alumnos. Esto nun significa, aportunó Celaá, que s’amenorguen les ratios, sinón una alternativa pa garantizar que los neños puedan allegar a clase, siguiendo la llínea d’otros países europeos. Esta midida podría adoptase dende Infantil hasta cuartu de Primaria y consiste n’establecer un grupu d’esa cifra, con un solu docente de referencia o máxime dos que podríen caltener una relación normal, como si fuera una unidá familiar.

Celaá recordó que’l Gobiernu va tresferir 2.000 millones a les comunidaes pa destinalos a educación, anque la repartida entá nun se fixo pública. Nesti sentíu, Suatea pidió que’l dineru sía pa la rede pública. El sindicatu criticó la postura del ministeriu, al qu’acusa de «inconcreción» ya inclusive tacha de «llastre» a la ministra, Isabel Celaá. Tamién CC OO pide esclariar los presupuestos , una y bones «los grupos de 15 alumnos nun se faen con intenciones nin ilusiones, facer con recursos económicos».