Los asturianos siguen penrriba la media estatal na llectura de prensa y lliteratura

Cásique’l 60% de los ciudadanos del país asturianu mayores de 14 años reconoz que llee con mayor o menor frecuencia, tando penrriba de la media estatal (56,9%), según el Barómetro de hábitos de lectura y compra de libros 2007 de la Federación de Gremios d’Editores d’España. Asturies tamién caltién la so posición privilexada ente los llectores de periódicos en segundu llugar tres de Navarra con seis de cada diez entrevistaos manifestando lleer diariamente la prensa.

N’Asturies, cuatro de cada diez de los que se declares llectores son llectores davezu, lleendo llibros a diariu o cada selmana. El 17,6% ye llector ocasional y entá hai un 41,6% d’asturianos que nun lleen enxamás.

Los llectores xorrecieron nel país dende’l 53 % nel 2005 al 58,4% nel 2007, nel caberu censu de llectura per autonomíes de la FGEE. Asturies alcuéntrase nel pelotón de cabeza de la llectura n’españa, superáu namái que por Madrid, Cataluña y les Islles Canaries, no que cinca a los llibros, y por Navarra no que cinca a la prensa.

Los datos sobre llectores de prensa diaria en 2008 ufrióles esta selmana l’Institutu Nacional d’Estadística (INE), amosando que más de la mitad de los españoles nun consume información al traviés de la prensa diaria, escontra’l 42,1% que sí lo fai.

El porcentaxe de llectores de prensa diaria xorreció en 2008 en toles comunidaes autónomes menos en cuatro: Aragón, onde amenorgó un 1,7%; Canaries (-1,5%), Castilla-La Mancha (-1,2%) y Les Baleares (-0,3%), mentantu que se caltuvo n’Asturies.