Llugones celebró’l XII Mercáu Tradicional

El Parque de la Paz acoyó esta fin de selmana de mayu una nueva edición del mercáu tradicional con mediu centenar d’artesanos y un variáu programa d’actividaes d’animación, platos fuertes del eventu.

La Fundación Municipal de Cultura de Siero entamó’l XII Mercáu Tradicional de Llugones, que se celebró los díes 26 y 27 de Mayu nel Parque de la Paz de la localidá. L’eventu, dedicáu a la cultura celta, concíbese non yá como una cita comercial y dinamizadora, sinón tamién como una actividá sociocultural y lúdico cola pretensión d’ufiertar a los visitantes una oportunidá d’averase a los productos artesanos y a oficios d’antaño güei sumíes.

Mediu centenar de puestos artesanos  distribuyeronse pola feria habilitada nel parque de la localidá. Ente los mesmos destacaron los dedicaos a l’artesanía de la madera, el cueru, la cerámica, la bixutería, les esencies, el vidriu o la cestería, ensin escaecese de los venceyaos a la repostería, la panadería, los quesos o los embutíos. Un númberu importante d’ellos llegaron a Llugones dende distintos puntos d’España. Tamién pudieron contemplase dellos talleres d’artesanía en vivu.