Llanes acueye el primer fin de selmana de payares la VI edición de “Llanes al cubo”

Durante el primer fin de selmana de payares Llanes va agospiar la sexta edición de “Llanes al cubo “o la “Folixa del Tardíu”, que enllenará de conciertos y xeres la capital de conceyu durante estos tres díes. Según el consistoriu llaniscu l’enfotu d’esti festival ye amosar la tradición cultural asturiana cola modernidá. Llanes al cubu ta enmarcáu diento del programa d’ociu “Otoño Llanes, contigo todo el año”, que desendolca una interesante ufierta deportiva, gastronomica, cultural y festiva durante los fines de selmana d’ochobre y payares en tol conceyu.

Esti vienres 2 de payares entama el festival ya dende les 17:00 hores cola apertura de la Carpina Los guah.es en La Bombilla. Esti recintu va ser l’escenariu durante tol fin de selmana de la cellebración de varios talleres pa neños y la xente mozo como el taller d’arqueloxía,el taller rupestre, el de chaples o el de disfraces. Amás va haber cuenta cuentos y un xuego de la oca. Esi mesmu día el platu fuerte de la xornada entema a les 22:00 hores colos conciertos de l’asturiana Anabel Santiago, el grupu folk Skye Peatbog Faeries y Claude Methe.

Enantes del cnciertu de les diez, a les 20:30 hores ye’l turnu del grupu de folk Tuenda, el pasacais medieval nel Cascu Antiguu de Llanes (19:00 hores) y la presentación de los curtios que participen nel Festival Nacional de Curtiumetraxes al Aire Libre “REC” (Ribedeva en Curtiu). Esti últimu actu será na Casa de la Cultura a partir de les 18:00 hores.

Kiko Veneno, Muchachito Bombo Inferno y Carmen París van ser los artistes principales na segunda xornada de “Llanes al Cubo” con un recital qu’entama a les 22:00 hores na Carpona de La Bombilla. El conciertu de les 20:30 hores na Carpa’l muelle d’esti sábadu va correr a cargu de la banda de folk fusión asturianu Dulcamara. La xornada del sábadu tamien va cuntar cola presencia del director Ramón Lluis Bande pa presentar el dvd “Camín de Cantares” y de les escritores Vanessa Gutierrez y Beatriz R. Viado que van presentar el so llibru “El país del silenciu”.

Marea traen el so rock urbanu a la Carpona (22:30 hores) na última xornada del festival que va quedar completada con un conciertu de tonada del cantante Celestino Rozada na Carapa’l Muelle (20:30 hores) y la presentación de la serie de dvd “Diez Autores, Diez Llugares” a cargu de Joe Braña na Casa de Cultura. El programa d’esti últimu día entama ya dende les 13:00 hores cola maxa del Magu Norber col espectáculu “Ilusionariu”.

Amás l’Ayuntamientu de Llanes programó delles actividaes complementaries como l’amagüestu en La Bombilla (vienres y sábadu), una feria d’artesanía, feria del llibru y del discu, teatru na cai con “Los Piroduendes” y una amuesa antolóxica de los tallistes de madera Llonguera y Pablo González.

Web oficial del festival