Llacín abre esti vienres Llanes al Cubo con más de 100 músicos enrriba l’escenariu

Esti vienres 31 d’ochobre de 2008 a les 22 hores y nel marcu de la programación del festival LLANES AL CUBO, la Banda Gaites LLACÍN va presentar el conciertu “XIDECES”, un espectáculu que va aconceyar a un gran elencu d’artistes invitaos, que xunto colos propios miembros de la Banda, sumarán un númberu perriba de los 100 músicos n’escena, pa tratar de reflexar en directu l’últimu trabayu discográficu qu’acaba de sacar a la lluz la formación del Conceyu Llanes. Con esti conciertu entamen les actividaes d’esta programación musical y cultural en conceyu Llanes que lleva algamando l’interés de toa Asturies nel mes de Payares de cada añu.

Nel llinguax de los teyeros de Llanes, la «xíriga», Xideces, vien a dicir «les coses buenes de la vida, les coses guapes, les cosines prestoses»… Baxo estes premises preséntase l’espectáculu XIDECES de la Banda Gaites LLACÍN. El discu garra’l títulu d’una de les pieces compuestes pol direutor Vítor Carbajal, onde puede notase la fusión ente una banda gaites y un grupu folk. A esti tema, hai que suma-y diez temes más, nos qu’apaeen delles pieces tradicionales asturianes del mundu de la tonada («Lloraba una cabraliega», «En la gaita traigo a Asturies»), del baille y de les dances («Trillu», «El Ramu Vibañu», «La h.oguera») y otres igües de pieces bretones, irlandeses y escoceses.