L’exame de 6º de Primaria va costar millón y mediu d’euros

La evaluación esterna y estandarizada que se va a realizar esti cursu a los alumnos de 6º de Primaria (12 años) de toa España va costar al Gobiernu un millón y mediu d’euros.

En concretu’l Ministeriu d’Educación, Cultura y Deportes tien contemplaos nos sos presupuestos pa 2016 destinar una partida de 1.451.930 euros a financiar la realización d’esti exame.

Asina lo espresa’l Departamentu que dirixe Íñigo Méndez de Vigo nuna nota informativa, dempués de que’l Gobiernu aprobara en Conseyu de Ministros el real decretu que regula les característiques d’esta polémica prueba.

El Gobiernu preve que participen na preba 481.375 alumnos qu’anguaño cursen 6º de Primaria en casi 14.000 centros docentes, tantu los públicos como los alcordaos y privaos.

Por si acasu en dalguna comunidá autónoma contraria a esta evaluación se declarasen oxetores y decidieren nun faela, el Ministeriu sorraya que tien de realizase “en tol sistema educativu español, a tolos alumnos y centros d’Educación Primaria”.

Les autonomíes “tienen de garantizar les condiciones fayadices d’aplicación y calificación” de la prueba, concreta, pa que nun quede ninguna dula. Sicasí, el redactáu final da enforma marxe d’actuación a les comunidaes autónomes, yá que-yos atribuye la función del diseñu, aplicación y corrección d’esta prueba, lo mesmo que de “concretar los criterios d’evaluación, los estándares d’aprendizaxe evaluables y el diseñu” de la prueba de Llingua Cooficial y Lliteratura.

A diferencia de les reválides de 4º de la ESO (16 años) y 2º de Bachilleratu (18 años), esti exame nun tien efectos académicos y “nun va condicionar l’accesu a la Educación Secundaria Obligatoria”, polo que l’alumnu que suspenda l’exame va poder pasar al cursu siguiente.

La preba, que va ser correxida por profesores funcionarios ayenos a los colexos, va esaminar de competencia matemática, comunicación llingüística y ciencia y tecnoloxía y el so fin ye diagnosticar “dificultaes d’aprendizaxe” y tomar a tiempu les midíes oportunes.

El Gobiernu defende que les evaluaciones esternes son un enclín internacional”, yá que en 24 de los 34 países de la OCDE hai pruebes d’esti tipu. Con esta preba podrán faese rankings por colexos y comunidaes autónomes.