Les radios llibres asturianes buquen el sofitu de colectivos

Les radios llibres d’Asturies, que viven momentos complicaos dempués de les actuaciones de la Provincial de Telecomunicaciones d’Asturies, dependiente del Gobiernu d’España, pide a colectivos asturianos el so sofitu al traviés d’un “Manifiestu d’apoyu a les radios llibres asturianes”. Ente les peticiones ta la esixencia de que “s’acaben darréu les midíes de presión pa coles radios llibres y comunitaries asturianes” y el reconocimientu “del llabor desenvueltu por estes emisores y la planificación de frecuencies que respuenda a la demanda de Servicios de Comunicación Comunitarios n’Asturies pa cumplir lo establecío nel artículu 32.2 de la Llei 7/2010”.

Esti ye’l manifiestu completu:

MANIFIESTU D’APOYU A LES RADIOS LLIBRES ASTURIANES

Dende________________________________________________________________

queremos mostrar la nuestra protesta más firme pola actuación de la Xefatura Provincial de Telecomunicaciones d’Asturies respecto de les emisores comunitaries.

La Xefatura Provincial de Telecomunicaciones d’Asturies, dependiente de la Secretaría d’Estáu de Telecomunicaciones y pa la Sociedá d’Información (Ministeriu d’Industria, Turismu y Comerciu) entamó l’unvíu de cartes a les comunidaes de propietarios onde s’asitien los equipos d’emisores de radios non autorizaos. Nelles ríquen-yos información de la titularidá de los equipos y infórmenlos de les sanciones posibles que lleguen hasta multes de 500.000 €.

Consideramos que l’envís de la midida ye en cierto’l presionar a estes emisores y asustar a les comunidaes de propietarios que dieron el preste a la instalación d’equipos.

Tala interpretación correspuéndese pa detrás coles declaraciones del Xefe Provincial a dalgunes de les radios afectase onde-yos indica la so fin de favorecer el pieslle d’estes emisores que lleven tantos d’años emitiendo na “illegalidá”.

Trátase, poro, d’una midida d’acosu y de criminalización pa coles radios llibres y comunitaries asturianes por una situación d’irregularidá que ye responsabilidá de l’Administración autonómica y estatal.

Asturies cuenta con una tradición importante de les denomaes radios llibres y comunitaries que principiaron a surdir a empiezos de los años ochenta. A pesar del importante llabor desenvueltu por estes iniciatives ciudadanes nel ámbitu de fomentu de la cultura asturiana, la participación ciudadana, el pluralismu y l’exerciciu de la llibertá d’espresión, les distintes Administraciones evitaron el reconocimientu llegal d’estes emisores dexándoles nuna situación de precariedá y indefensión.

En vez d’actuar contra les radios comunitaries ye necesario facer efectivu l’artículu 4.1 de la Llei 7/2010, de 31 de marzu, Xeneral de Comunicación Audiovisual qu’indica de manera testual que “Toles persones tienen el derechu a que la comunicación audiovisual s’ufra al encruz d’una pluralidá de medios, bien públicos, comerciales, bien comunitarios, que reflecten el pluralismu ideolóxicu, políticu y cultural de la sociedá”.

Poro, MANIFESTAMOS:

• El nuestru apoyu y solidaridá pa coles radios llibres y comunitaries asturianes.

• Esiximos que s’acaben darréu les midíes de presión pa coles radios llibres y comunitaries asturianes.

• El reconocimientu del llabor desenvueltu por estes emisores y la planificación de frecuencies que respuenda a la demanda de Servicios de Comunicación Comunitarios n’Asturies pa cumplir lo establecío nel artículu 32.2 de la Llei 7/2010.