Les plantiyes de profesoráu crecen en 203 places y lleguen a los 9.182 docentes

La Conseyería d’Educación y Cultura cerró’l procesu de negociación de les plantiyes de profesoráu de los centros públicos pal cursu 2018/2019 xuntu coles organizaciones sindicales representaes na mesa sectorial.

La propuesta definitiva, con 9.182 puestos, constitúi una medría de 203 docentes con respectu al cursu pasáu, y supon el mayor aumentu de los postreros ocho años.  El director xeneral de Personal Docente, Manuel Villar, matizó esti día que, al marxe d’esta plantiya básica, tolos centros van cuntar el próximu cursu escolar col númberu de profesionales que precisen p’atender les demandes del sistema educativu, cuidando qu’a estos docentes sumaráse’l personal funcionariu de carrera ya interín oportunu, una vegada déanse a conocer los datos reales de matriculación.

Pela so parte, el conseyeru d’Educación y Cultura, Genaro Alonso, afirmó esta selmana qu’espera dar a conocer en febreru’l númberu de places de ca especialidá que se va convocar na Ufierta Pública d’Empléu de 2018. «Agora solo queda determinar el númberu de places per cada especialidá. Cifra que tien qu’axustase na mesa xeneral», indicó, adelantrando que, al nun haber Presupuestos Xenerales del Estáu y desconocer la tasa de reposición, l’Executivu autonómicu va afitar el númberu de places basándose na tasa de estabilización.

El conseyeru señaló tamién qu’entá nun tien cuantificaes les necesidaes de creitos estraordinarios pal so departamentu, pero amosó’l so interés en cuntar colos fondos necesarios que dexen sacar alantre los proyectos de construcciones, que son los «más afectaos» pola prórroga presupuestaria.

Alonso tamién se refirió a les crítiques d’UXT y Suatea, que’l llunes tachaben d’insuficiente la propuesta manifestando que s’afitaren en base a criterios económicos y non pedagóxicos y acusando al Gobiernu de querer distrayer y engañar a los más inocentes. «El númberu de places aumentó, y pa nada hubo directrices restrictives, sinón d’eficiencia y eficacia», defendíase ayeri’l conseyeru.

Pela so parte, l’Asociación de Docentes Interinos d’Asturies (ADIA), valoró «positivamente la decisión de la conseyería de retrasar l’anunciu si ello ye por cuenta de un procesu de revisión y ampliación de places tal que se reclamó». Sicasí, ADIA diz echar en falta una vegada más dalgún tipu d’esplicación al respeutu más allá del meru anunciu referente al retrasu».