Les partes alluguen la negociación pa la oficialidá na vía muerta

La negociación pa la oficialidá paez entrar en vía muerta, depués de negase Foro a retirar les sos esixencies de rebaxes fiscales a los más ricos y nun dar un pasu al respective les fuerces d’izquierda.

La negociación pa la oficialidá quedó en vía muerta pa los partíos de la izquierda, tres la negativa de Foro a siguir alantre cola reforma si nun se venceya’l procesu a la eliminación d’impuestos. El secretariu d’estratexa política d’IX, Alejandro Suárez, resumió la situación dendela perspeutiva de la izquierda: “26 votos a favor de la reforma del Estatutu y hai unu qu’asitia la cuestión de la fiscalidá como elementu insalvable”.

El calendariu ye cada vez más afechu si pretende llegase a llograr la oficialidá nesta llexislatura, por culpa de que, amás de n’Asturies, ye imprescindible llegar al Congresu pa la so posterior tramitación nes Cortes Xenerales, pa lo que sería imprescindible dalgún movimientu ente lo que queda de mes y principios de febreru.

Izquierda Xunida trató dende l’entamu de la Llexislatura llegar a alcuerdos pa llograr la oficialidá, sigún espublizaba ayeri na so páxina web. Ello ye que frente a les esixencies de Foro, la formación arrenunció a reformes estatutaries como la relativa a les circunscripciones electorales y aceptó elementos especialmente esixentes nel posterior desenvolvimientu de les lleis sobro l’asturianu, con unes mayoríes reforzaes. La única llínea colorada foi, dende l’entamu, la fiscalidá, al entender que nun puede entemecese la reconocencia d’un derechu, como ye la oficialidá, con cuestiones relatives a rebaxes fiscales pa les clases más privilexaes.

El PSOE ye la primera vegada que s’alluga del lláu del asturianismu na so propuesta programática y electoral y Podemos tien nos sos enfotos costituyentes la oficialidá como daqué irrenunciable.