Les guarderíes privaes ven imposibles de cumplir les condiciones pa so reapertura

Un total de 24 guarderíes privaes del Principáu secundaron un manifiestu nel qu’espresen la so oposición a la reapertura voluntaria de los centros so la so responsabilidá y aseguren que ye «totalmente imposible» cumplir les midíes de prevención y actuación recoyíes nel protocolu aprobáu’l pasáu vienres pola Conseyería de Derechos Sociales y Bienestar (de la que dependen).

Consideren que, dada la situación actual y pa evitar posibles andaes, lo más coherente ye siguir los pasos de la Conseyería d’Educación, que decidió que les escueles públiques de 0 a 3 años (que dependen d’ella) nun reabran hasta’l próximu mes de setiembre. Y cuestiónense por qué mientres los centros públicos permanecen zarraos déxase vía llibre a les guarderíes privaes, magar delles ya s’alcuentren abiertes ensin problemes.

Nel manifiestu fechu públicu pelos centros privaos reclamen a l’Alministración rexonal qu’enllargue hasta setiembre midíes como los ERTES, el caltenimientu de ceses d’actividá, la suspensión de cuotes d’autónomos o la compensación de matrícules perdíes pola baxada de ratio prevista nel protocolu (cinco neños por cuidadora a lo más. Cuatro, si son menores d’un añu) y ayudes directes al sector. Apunten que, magar ser bienveníes, estes ayudes «nun cubrir, nin por asomu, los gastos de los centros zarraos». Y que la so reapertura, so les condiciones indicaes pola Conseyería de Derechos Sociales y Bienestar, tanto pola ratio como pola inversión que se precisa en midíes de protección y desinfección o’l rescate del personal que ta nun ERTE, «solo sumaría deldes».