Les fiestes de La Llaguna, en L’Entregu, recuperen la figura del Rei Aurelio

Dende esta tarde y a lo llargo de tola fin de selmana, les fiestes de La Llaguna de L’Entregu, nel conceyu de Samartín del Rei Aurelio, van convertir la localidá nuna ciudá medieval n’homenaxe al rei que da nome al municipiu. La Sociedá Cultural y de Festeyos de L’Entregu decidió asina recuperar la figura histórica d’esti monarca asturianu col oxetivu de dinamizar les fiestes populares.

Los festeyos empiecen esta tarde, a les ocho, cola coronación del monarca asturianu nel Teatru entreguín, asina como la representación de la primera parte d’una obra, basada na historia d’Aurelio, que fue escrita pa la ocasión por Pablo Rodríguez Medina y llevada a escena pol grupu de teatru Refaxu. La otra mitá de la pieza sedrá representada’l prósimu sábadu de tarde.

Ún de los atractivos de les fiests va ser l’amplia participación vecinal que van convertir la ciudá nun verdaderu mercáu medieval, que va cuntar con caballeros, monxos, señores feudales, dames, cortesanes, princeses y nobles. Más de doscientos traxes medievales foron alquilaos nos últimos díes pa esta ocasión, na que los hosteleros tamien van ambiertar los sos locales con cortes del medievu.

Nes cais de L’Entregu nun van faltar los malabaristes, trovadores, ciegos con lazarillos, bufones y caballeros que van percorrer el pueblu mentes que los artesanos van ufiertar los sos productos y amosar los sos oficios ente los visitantes que quieran adientrase nuna dómina diferente pa esta fin de selmana festiva.