Les escueles de música de Llangréu y Noreña entamen un taller de xuegos tradicionales p’adultos

Les escueles de música tradicional de Llangréu y Noreña abren esti añu conteníos a munches más coses que la música, en primer llugar anunciaron yá un cursu pal aniciu de los neños na cultura tradicional, y dan anuncia agora d’un cursu de xuegos tradicionales, que según el profesor, Carlos Suari “va tener un enfoque mui al estilu taller, lo principal ye poner en común xuegos y deportes”.

Sicasí, tamién va tener conteníu teóricu, anque seya namás “Ente carrera y carrera, dando cuenta de dalguna curiosidá, apunte metodolóxicu o teóricu”. Les clases, que van durar tol cursu académicu sedrán un día a la selmana, a últimes hores de la tarde (de 7 a 9 aprox.). Anque esti cursu pue camudar dependiendo del númberu d’alumnos, pudiendo duplicase.

El cursu de xuegos tradicionales p’adultos empobínase a una población variao que, como base, presenta bona gana de pasalo bien y reflexonar sobre la importancia de lo lúdico nel nuesu patrimoniu cultural. Por eso, toa persona con interés na tradición asturiana va tener la oportunidá de recibir otru puntu de vista sobre una estaya davezu escaecida y maltratada. Amás, perfiles profesionales como’l d’animador/a sociocultural, monitor/a de tiempu llibre, maestra/u o profesor/a, van sacar bon rendimientu d’esti cursu que tamién va tratar del significáu y la bayura lúdica asturiana, del so orixe y la so posible aplicación na sociedá actual.

D’haber un grupu namás, el cursu sedrá en Noreña “que ta más céntrico”. Pa más información o p’apuntase ha llamase al teléfonu 985 67 71 13.