Les emisiones n’asturianu doblen na TPA l’audiencia de los informativos en castellán

Esti sábadu 7 d’abril la programación en llingua asturiana tornó a meyorar la audiencia de la TPA en castellán, hasta’l puntu de duplicar el meyor resultáu d’audiencia del día (l’informativu de la nueche col 9,8 por cietu) na emisión de Camín de Cantares qu’algamó picos del 25 % de l’audiencia. La emisión en llingua asturiana, colos programes “Pieces”, “Nós” y “Camín de cantares”, ta sorprendiendo y dexando a les clares que los conteníos d’interés palos asturianos son los que tienen de ver cola so cultura y la so llingua, por muncho que les producciones en llingua asturiana tengan munchísima menor inversión y por tantu medios téunicos y profesionales que la programación en castellán.

Con una audiencia que llegó a superar el 10 por cientu y tuvo penrriba de los programes más vistos que s’emitieron en castellán nel primer sábadu d’emisión, el 31 de marzu, y penrriba de la media de los que s’emiten a lo llargo la selmana, la segunda entrega de los programes que ta acabante d’entamar a emitir la TPA nun pudo tener meyores resultaos.

Los programes en llingua asturiana entamaron amás esti sábadu con un horariu adelantáu por mor de la tresmisión en direutu de les carreres de caballos de Ribesella, arrancando a les 11:00, horariu nel que s’emitió “Pieces”, siguiendo con “Nós”, previstu pa les 11:30 hores y finando con “Cantar de Cantares”.

‘Nós’ ye un microespaciu de TPA producíu en collaboración con Zebrastur y dirixíu pol periodista asturiano, y direutor d’Asturnews, Próspero Morán. ‘Nós’ emitese los sábados a les 12.55 hores.

‘Pieces’ ye un programa sobre la cultura asturiana tradicional y contemporánea con cinco secciones. Esti formato permite tamién ser programáu como multidifusión a lo llargo de la semana pa captar el másimo posible de públicos diferentes y ser compactáu na fin de selmana como programa unitariu.

‘Camín de Cantares’ ye una serie documental inspirada nel Archivu de la Tradición Oral na que Xoxé Ambás, investigador de la cultura tradicional asturiana, actúa como conductor del espacio y fai una entrevista en cada capítulo.

Audiencies autonómiques del 7 d’abril