Les dures crítiques a Trump monopolicen los premios del Sindicatu d’Actores

‘Fences’ y ‘The Crown’, con dos galardones per cabeza, fueron los vencedores de la 23 edición de los premios del Sindicatu d’Actores (SAG, n’inglés), pero les sos victories quedaron en segundu planu nuna gala marcada de principiu a fin poles dures crítiques a Donald Trump.

La nueche na que los actores de Hollywood aconceyen y reconocen los sos talentos convirtiose nuna velada reivindicativa, emotiva y apinada d’afilaos dardos contra les polítiques del presidente de EE UU, especialmente sobre la inmigración.

Trump robló’l vienres un polémicu decretu que suspende la entrada de tolos refuxaos mientres 120 díes y la concesión mientres 90 díes de visaos a siete países de mayoría musulmana con historial terrorista -Llibia, Sudán, Somalia, Siria, Iraq, Yemen ya Irán- hasta que s’establezan nuevos mecanismos de vixilancia. Esta disposición, que provocó numberoses protestes en tol país sobremanera nos aeropuertos, foi parcialmente bloquiada por una jueza federal el sábadu en respuesta a una demanda de la Unión pa les Llibertaes Civiles n’América (ACLU).

Unu de los grandes momentos de la nueche foi l’apasionáu discursu de David Harbour (‘Stranger Things’) en defensa de los débiles. “Vamos refugar a los abusones, vamos acoyer a los bichos raros y los marxinaos, a los que nun tienen casa. Vamos superar les mentires, vamos cazar bisarmes”, glayó Harbour con bien de enerxía. “Y cuando teamos confundíos ente la hipocresía y la violencia eventual de ciertos individuos ya instituciones, nós, como’l xefe Jim Hopper (el so personaxe en ‘Stranger Things’), vamos cutir a quien intente destruyir a los débiles, los privaos de derechos y los marxinaos”, dixo nel discursu más ovacionáu de la velada.