Les asociaciones d’Avilés finen la formación sobro tramitación alministrativa y electrónica

Esti miércoles 8, la conceyalía de Participación y Ciudadanía finará una serie de sesiones formatives empobinaes a les asociaciones del conceyu pa facilita-yos información sobre trámites y xestiones que los afecten como entidaes.

Dende va meses les entidaes d’Avilés vienen manifestando duldes sobro les obligaciones de calter contributivu y llaboral, amás d’entrugues diverses sobro la tramitación electrónica cola alministración pública.

Les sesiones vienen realizándose ente’l 6 y el 8 de febreru nel Centru Municipal d’Arte y Esposiciones d’Avilés (CMAE) na cai Llanu Ponte númberu 49, n’horariu de 17 a 19 hores. La entrada ye llibre hasta completar l’aforu.

Les dos primeres sesiones foron impartíes por Luis Miguel Fernández Romero, asesor nel Conseyu de la Mocedá del Principáu d’Asturies (Conseyu de la Mocedá del Principau d´Asturies), nos ámbitos xurídicu-social y organizacional, con amplia esperiencia n’asesoramientu a entidaes.

Esti miércoles 8 van concluyir les sesiones con una charra sobro la see electrónica del Conceyu d’Avilés, a cargu del serviciu de Nueves Tecnoloxíes del Conceyu. Van Esplicar los trámites habituales que pueden realizase y la forma de dase d’alta na mesma.

Pa rematar la sesión va informase sobro les subvenciones municipales: los requisitos pa ser consideraos entidaes beneficiaries y les formes de solicitú y xustificación; información que tamién se demandó per parte de les entidaes.