Les Asamblees d´Estudiantes denuncien que’l Rectoráu ta criminalizando les lexítimes protestes del alumnáu

En sofitu a les compañeres del Campus de Viesques, zarraes na so Biblioteca pa torgar el pieslle d´esta, dende les Asamblees d´Estudiantes de la Universidá d´Uvieu vienen calteniendo tamién aiciones zarrándose nes Facultaes de Psicoloxía y Medicina. Ante esta situación el Rectoráu, a falta d’actuar de forma coherente colos fechos, una vegada más “criminaliza a les estudiantes, utilizando la vía coercitiva pa evitar voces que clamen escontra la so política cómplice del desmantelamientu de la Universidá Pública Asturiana” según denuncien les Asamblees.

Tres hores d´abusos de poder materializaos n’amenaces a los distintos zarros, les Asamblees denuncien que “la Policía Nacional personose na Facultá de Psicoloxía, entrando finalmente nes dependencies de la mesma, col propósitu d’identificar a les estudiantes qu´ellí taben. En postrera instancia l´allanamientu de la Universidá y la violación de l´autonomía Universitaria, fue salvaguardada de manera fortuita, pues la llegalidá del asuntu quedaba n’entredichu”.

Por mor d’ello, denuncien”el mal tratu exercíu por parte del Rectoráu, tantu na xornada de güey como nes pasaes, que nun fae más que poner de manifiestu la falta de voluntá y capacitación de Vicente Gotor y el so equipu rectoral a l’hora de xestionar la Universidá y de comunicase cola comunidá universitaria pa solucionar el contínuu desmantelamientu y mercantilización de la Universidá Pública”.

Nel comunicáu qu’asoleyaron ayeri, les Asamblees esixen tamién “la inmediata reapertura de la Biblioteca del Campus de Viesques, y el firme compromisu de qu’en nengún Campus nin Facultá volverán a tomase decisiones de tales magnitues al marxen de la comunidá universitaria”.

Por too ello faen un llamamietnu “a toles persones que de manera direuta o indireuta se vean afectaes poles pésimes xestiones que tan llevándose a cabu, pa que xuntes recuperemos lo que por drecho ye de nueso”.