L’Ascensión torna a Uviéu

La feria ganadera de L’Ascensión, l’homenaxe d’Uviéu a los homes y muyeres del campu, estrena anguaño un nuevu allugamientu. Tres casi quince años celebrándose nel conceyu vecín de Llanera, l’amuesa de reses torna al conceyu.

La SOF aprobó esta selmana pasada na so Xunta de Gobiernu la instalación nuna área de 30.000 metros cuadraos del polígonu industrial de Olloniego-Tudela, propiedá del Conceyu d’Uviéu. El presupuestu global de la Feria xube a 245.245 euros, menor que n’años anteriores magar la inversión aprobada pal acondicionamientu del polígonu de Olloniego, cuantificado en 58.700 euros.

La feria de ganáu ye unu de los eventos más curiosos de la fiesta de L’Ascensión, cola que tradicionalmente Uviéu reconoz a les xentes del mundu rural. Va celebrase los díes 6, 7 y 8 de mayu y, al marxe de la esposición ganadera, va incluyir atracciones, vienta de productos artesanos, exhibiciones y un ampliu programa d’actividaes en dellos allugamientos del cascu urbanu.

Asina, en La Llosa ta previstu una esposición de productos asturianos, artesanía y puestos de quesos y productos ecolóxicos de la rexón. El mesmu escenariu va acoyer l’Amuesa de Folclore d’Asturies, con actuaciones musicales gratuites mientres los trés díes y n’horariu de mañana, tarde y nueche. Van Xubir a les tables, ente otros, Xuacu Amieva, ‘Texedor’ o Jerónimo Granda.

Tamién ta prevista la instalación de l’amuesa “Xeitu en L´Ascensión”, que va tresportar al visitante a empiezos del sieglu pasáu al traviés del cante y baille. Nun van faltar en La Llosa los talleres en vivu, con exhibiciones d’artesanía, alfarería o telares.

La plataforma de Renfe va acoyer tamién la esposición zoolóxica “El Monte”, con animales procedentes de los cinco continentes; l’amuesa “Tinéu, naturaleza a la carta”, que va dexar visitar una casa vaqueira o un chigre. Les aves y animales ornamentales tamién van tar presentes en La Llosa, al igual qu’una amuesa con exemplares de los siete races autóctones d’Asturies.

La programación de L’Ascensión en La Llosa inclúi amás l’amuesa “Un Valdesoto de cine”, cola proyección de la película –ensin soníu- “Adiós Cordera” y la representación en vivu de dalguna de les sos escenes. El mesmu escenariu va ser tamién pa la esposición “El Llar de Sabugo ¡Tente Firme!” d’Avilés, cola recreación d’escenes tradicionales de la vida rural asturiana.

El deporte rural tamién va tener espaciu en L’Ascensión, con exhibiciones de deportes tradicionales asturianos como la curtia de tueros, el tiru al palu, la carrera de lecheres…que van completar la programación de La Llosa.

El Mercau Ástur volverá instalase na plaza de la Catedral y en Porlier. Va facese’l vienres de tarde y va permanecer abiertu hasta’l domingu, día 8. L’amuesa va incluyir talleres artesanos, mercadín tradicional, degustaciones, vienta de productos, atracciones pa los más pequenos y paseos en pollín.

El folclore va ser el protagonista’l sábadu, día 7, cola actuación d’un total de 26 formaciones musicales procedentes de toa Asturies. Les bandes de gaites y grupos de baille van actuar, n’horariu de mañana, poles principales cais y places de la ciudá y, darréu, a partir de les 18. 00 hores, van participar nun Desfile pola cai Uría.

La tradicional repartida del bollu y el vinu va tener llugar na plaza d’España, el domingu, de 10 a 14 hores. La ufierta gastronómica de L’Ascensión completase col tradicional menú d’esta feria que van ufiertar los restoranes de la ciudá y que ta compuestu por: menestra de verduras, carne gobernada y tarta de quesu con cereces.

L’Auditoriu volverá acoyer, el domingu, a les 13.00 hores, l’Homenaxe al Paisanu y la Paisana del añu, col que’l Conceyu d’Uviéu, en collaboración cola Fundación Caxa Rural d’Asturies reconoz la entrega de dos de los ganaderos y llabradores más veteranos de la rexón.