L’Anuariu de la Música Asturiana repasa nos kioscos 2013

Como ye vezu por estes feches, Goxe Producciones publica l’Anuariu de la Música Asturiana, un volume onde fai resume de lo que foi l’añu musical n’Asturies. La decimoquinta entrega d’esta publicación vien nesta ocasión con más de cien páxines a tou color y información abondo sobre bien d’aspectos que tienen a la música del país como protagonista.

La portada d’esta entrega nueva protagonízala’l Festival Intercélticu de Lorient, qu’esti branu pasáu dedicaba la so última edición a Asturies, asina nes páxines centrales apaez tamién un repasu fondu a lo que dio de sí la representación asturiana nesi alcuentru músico-cultural de gran importancia. Otros conteníos destacables son reportaxes como’l tituláu «(Sobre) Viviendo de la música»; cróniques como les dedicaes al II Sol Celta d’Avilés o al Festival Arcu Atánticu de Xixón; l’informe «Cuando Lluis Llach nun sonaba na radio», onde se fai una comparanza ente’l tratamientu que les radios públiques autonómiques dan a la música propia de les sos respectives comunidaes; artículos d’opinión dedicaos, ente otres cuestiones, al trenta aniversariu de la Noite Celta de Porcía o a la polémica suspensión del conciertu d’Albert Pla en Xixón; un reportaxe fotográficu y lliterariu dobre’l discu Tiempos Modernos de Dixebra; un repasu a los diez años de vida del grupu Skama la Rede; amás d’entrevistes (a Misiva por exemplu) y les secciones Anuncies y Collecha, ente otros munchos temes.

La editorial d’esti AMA 2013 titúlase «Consumir música asturiana» y nél reflexónase alredor del mercáu musical asturianu, con frases como: «La solución a tou esti enguedeyu pasa inevitablemente por un mayor compromisu del poder públicu autonómicu, qu’entienda a la música asturiana non como un hobby d’unos cuantos «alloriaos» o como un productu esclusivamente destináu al ociu, sinón como un posible campu d’actividá económica estable y un factor d’internacionalización d’Asturies perimportante, que pueda valir d’escaparate del país. Pero tamién los músicos tienen que ser conscientes del so papel, resistiendo n’époques de crisis y nun dexando qu’ésta amenorgue la so creatividá y productividá. Ensin escaecer a los sellos discográficos, qu’han d’ufiertar productos atractivos, guapos, con «pluses» más allá de lo meramente musical qu’atrayan al posible comprador».

Como complementu sonoru l’AMA vien con un discu de regalu que ye un resume de les producciones apaecíes a lo llargo del añu 2013, con diecinueve temes que van de los soníos más tradicionales a los más contemporáneos: tonada, bandes de gaites, folk, canción d’autor, rock…