L’afgana Sakena Yacoobi algama’l premiu a la innovación n’educación

Na sesión inaugural del Cume Mundial de la Innovación na Educación (WISE, poles sos sigles n’inglés), la primer dama d’Estaos Xuníos, Michelle Obama, y la jequesa de Qatar, Mozah bint Nasser, diéron-y el galardón a Sakena Yacoobi.

Ante un auditoriu de 1.600 persones, Michelle Obama reivindicó tamién la educación de les muyeres coles sos alcordances pasaes que pa munches otres son entá presente: “Cuando la mio güela nació, les muyeres nun podíen votar. Cuando la mio madre yera una nueva esposa, nun podíen tener una tarxeta de creitu”.

En Qatar, dos terceres partes de los estudiantes universitarios y el 40% de la mano d’obra son muyeres, según los datos oficiales. “Eso nun ye casual, ye gracies al lideralgu de la jequesa”, estimó Obama. Na so intervención, Mozah bint Nasser punxo’l focu nel drama de los refuxaos.  Más de 62 millones de neñes nel mundu siguen ensin escolarizar. La Casa Blanca tien un programa, Let Girls Learn (Dexemos que les moces apriendan), que supervisa directamente la primer dama, con 7.000 voluntarios en 11 países. Michelle Obama pidió ayeri más esfuerzos p’aumentar y caltener la educación de les adolescentes en riesgu. 

La profesora afgana premiada, exiliada y educada n’Estaos Xuníos, dio clases a los sos compatriotes nos campos de refuxaos de Pakistán y diose cuenta de que la educación que alla -y camudó la vida podía camudar la del so país. Preside l’Institutu Afganu d’Aprendizaxe, que forma docentes “con pensamientu críticu” y qu’ayudó a instruyir a 12 millones de persones n’árees rurales y marxinales.