La Xunta denuncia que delles escueles de Siero nun dexen matricular a los neños n’asturianu

La Xunta pola Defensa de la Llingua Asturiana vieno acabante denunciar esti vienres dos casos nuevos d’ataque a la llingua asturiana nel sistema educativu, que vuelven evidenciar la precariedá llamentable y la situación d’allegalidá na que s’atopen los derechos llingüísticos y educativos n’Asturies. Según delles denuncies feches por dalgunos padres a la Xunta pola Defensa de la Llingua Asturiana, nes escueles Maestro Sarregui y Celestino Montoto de La Pola, conceyu de Siero, “tán negándo-yos el derechu de matricular a los fíos na asignatura d’asturianu con mentires qu’incumplen la llei”.

Ente les “mentires” de les que fala la Xunta alcontraríase, por exemplu, nun dexar que puean facelo nun cursu si nun lo ficieren nún anterior, “lo que va contra la circular que se mandó dende la Conseyería d’Educación qu’aclaraba que sí podía facese”. Tamién se da’l casu d’esvialos a l’asignatura de “Cultura Asturiana”, que yá nun esiste dende’l cursu 2007/08.

Otru casu más grave tovía ye ver cómo la dirección del Celestino Montoto niega’l derechu a estudiar asturianu porque los grupos “nun-y vienen bien a él” a la hora d’organizase, como dixo’l director públicamente.

La Xunta pola Defensa de la Llingua va facer llegar bien llueu esta denuncia a la Conseyería d’Educación pa que tome cartes nel asuntu y s’igue esti casu tan grave de violación de derechos llingüísticos y educativos. Amás, pala Xunta “ye preocupante’l papel que desempeña la inspección de la Conseyería porque ye raru’l día que nun llega a la Xunta pola Defensa de la Llingua dalguna denuncia o quexa por parte de los padres nel periodu de matriculación. Añu tres añu venimos teniendo que denunciar situaciones como esta, que se repiten sistemática y xeneralizadamente ensin que la Conseyería d’Educación faga nada por garantizar el cumplimientu de la llei”.

Nel mes de febreru pasáu la Xunta pola Defensa de la Llingua Asturiana convocaba una movilización pa denunciar la precariedá de l’asignatura que cuntó col apoyu unánime de tolos sindicatos d’enseñanza y que, pordesgracia, volvió chocar cola indiferencia absoluta de la Conseyería d’Educación.

Agora, tres la presentación d’una campaña gubernamental p’afalar a la matriculación na asignatura d’asturianu, la Xunta pola Defensa de la Llingua Asturiana quier “recordar que la primer campaña que habíen facer ye la del cumplimientu de la llei, garantizando que toos aquellos que quieran cursar l’asignatura d’asturianu puedan facelo ensin llimitaciones nin coacciones: que s’ufierte l’asignatura en tolos centros, en tolos niveles y pa tolos escolinos y escolines. Nun ye tolerable que na Asturies del sieglu XXI se siga prohibiendo estudiar y conocer la llingua propia a miles d’estudiantes de toles etapes que lo piden voluntariamente”.

Uviéu, 20 de xunu de 2008 Xunta pola Defensa de la Llingua Asturiana