La Xunta de Gobiernu d’Uviéu presenta la primer ordenanza de Tresparencia

La Xunta de Gobiernu del conceyu d’Uviéu vieno acabante apautar la primer ordenanza municipal de Tresparencia y Accesu a la Información.

La Xunta de Gobiernu del Conceyu d’Uviéu aprobó esti llunes la primer ordenanza municipal de Tresparencia, Accesu a la Información y Reutilización que da cumplimientu a les esixencies de la Llei de Tresparencia. El testu va someter al pertinente periodu d’alegaciones antes del so votacion en plenu y la so entrada oficial a valir.

La nueva ordenanza tien como oxeto garantizar y regular el llibre accesu a la información pública del Conceyu d’Uviéu, los sos organismos autónomos, empreses públiques y fundaciones d’iniciativa pública local, amás d’aquelles sociedaes mercantiles nes que la participación municipal s’alcuentre penrriba del 50 per cientu. Tamién van tar suxetos a esta normativa los axudicatarios de contratos municipales y aquelles entidaes que reciban subvenciones municipales por una cuantía municipal superior a los 100.000 euros o nes que les ayuda municipal suponga más del 40 per cientu de los sos ingresos añales, siempres qu’algamen un importe mínimu de 5.000 euros.

El testu foi redactáu teniendo en cuenta la propuesta de la Federación Española de Conceyos ya incorpora tamién toes prescripciones qu’en materia de Tresparencia marcó’l Principáu d’Asturies. Y al marxe de tola información pública qu’hasta agora podía consultase na web municipal, la nueva normativa incorpora otres  obligaciones como la publicación tolos contratos y convenios  suscritos, les actes de comisiones plenaries y sentencies dictaes en procedimientos nos que’l Conceyu fuera parte. Tamién s’inclúi la publicación de les retribuciones, indemnizaciones, declaraciones de bienes y perfil y trayectoria profesional de tolos titulares d’órganos directivos, personal eventual, y persones con máxima responsabilidá nel consistoriu o nes sos entidaes venceyaes.