La XPDLLA acusa al Gobiernu de desaniciar l’asturianu énte la puesta en marcha de la RTPA

Güei empiecen les emisiones regulares de la canal pública de televisión asturiana cola programación, a les ocho, del parte informativu de la tarde. Énte la puesta en marcha de la RTPA y la “presencia marxinal del asturianu nes sos emisiones”, la Xunta pola Defensa de la Llingua Asturiana denunció “‘l despreciu del Gobiernu asturianu pola opinión de los asturianos, que dende hai más de 15 años vien manifestándose mayoritariamente a favor de la esistencia d’emisores públiques de radio y televisión qu’emitan íntegramente n’asturianu” y acusólu d’ “avanzar nel procesu de substitución y desaniciu de la llingua”.

La Xunta pola Defensa de la Llingua Asturiana considera inalmisible que la presencia de l’asturianu nes emisiones de la RTPA se solventen cola “especial protección al bable” que figura na llei que dio pie a la creacción del Ente de Comunicación públicu asturianu. “El Gobiernu asturianu demuestra que non solo nun tien intención de trabayar na defensa del patrimoniu llingüísticu d’Asturies, sinon que mantien firme la so voluntá de siguir avanzando nel procesu de substitución y desaniciu de la llingua asturiana”, asegura la organización cívica nun comunicáu públicu.

“La esperiencia d’otres comunidaes con llingua propia que yá cunten con organismos de radiotelevisión amuesanos que los medios de comunicación audiovisuales son ferramientes indispensables de normalización social de les llingües amenazaes”, poro l’asociación en defensa de la llingua asturiana considera que quita-y esi usu na televisión pública a l’asturianu ye “imponer el castellanu nun ámbitu nuevu d’usu que-y va dar más puxu na presión qu’exerce pola sustitución llingüística total y apostar pola muerte segura del nuesu idioma autóctonu”.

Por ello, la Xunta pola Defensa de la Llingua Asturiana acusa al Gobiernu asturianu “d’actuar d’espaldes a la Constitución, qu’afita como obligación de los poderes públicos «promover les condiciones pa que la llibertá y la igualdá de los individuos y de los grupos nos que s’integra seyan reales y efectives, a la vez que reconoz y garantiza’l derechu a la llibre espresión y al accesu a los medios de comunicación públicos de los grupos sociales significativos, respetando el pluralismu de la sociedá y les demás llingües d’España»; de nun respetar l’Estatutu d’Autonomía d’Asturies, qu’otorga a Asturies les competencies sobre’l desarrollu llexislativu y execución del rexime de tolos medios de comunicación social y sobre’l fomentu y protección del asturianu; y d’incumplir la Llei 1/98, d’Usu y Promoción del Asturianu, qu’obliga a l’Alministración Autonómica a velar por una presencia axeitada del asturianu nos medios de comunicación nos que participe”.