La XDLA pide a los partíos políticos que negocien un articuláu sobre la presencia del idioma na llei nueva de RTPA

Nuna nota de prensa asoleyada esti xueves 17, la XDLA aplaude que “Foru Asturies presentó una enmienda que reclama que RTPA ayude a la normalización del asturianu y del gallego-asturianu y onde esixe la creación d’una industria audiovisual al traviés de la emisión de toa clas de conteníos nestes llingües” y tamién que “pela so parte, IX demanda un porcentaxe mínimu n’asturianu del 30% de los espacios, “incluíos los informativos”, y pide facer desconexones en gallego-asturianu “nes zones onde constitúi modalidá llingüística propia”. Amás, propón la presencia d’un representante de l’Academia de la Llingua Asturiana nel Conseyu de Comunicación de RTPA.

De mano, la XDLA entiende que la enmienda que meyor recueye l’espíritu del manifiestu ‘Cinco puntos por unos medios al serviciu públicu d’Asturies’, al que se sumaron una trentena d’entidaes y que se presentó na sede de l’Academia, ye la presentada por Foru Asturies, que desarrolla’l mandatu del Estatutu d’Autonomía y la Llei d’Usu del Asturianu, principios que nun tienen güecu na norma actual: “Les enmiendes d’IX, anque ameyoren lo qu’hai, nun son un avance sustancial: siguen supeditando l’asturianu a los campos de la educación y la cultura y falen de “promocionar el bable/asturianu”, non d’emitir n’asturianu. Tampoco tien sentíu referise al gallego-asturianu cola denominación de “modalidá llingüística” y pidir que s’emita la programación namás nes zones nes que se fala y non en tol territoriu asturianu”.

Otra manera, la inclusión de l’Academia de la Llingua Asturiana (ALLA) como miembro del Conseyu de Comunicación pareznos fundamental, polo que piden a tolos partíos “qu’apoyen esta propuesta d’IX. Too esto nun quita pa solicitar la creación d’un Conseyu Llingüísticu Asesor —con presencia de l’ALLA, Universidá, Dirección Xeneral de Política Llingüística y profesionales— encargáu de velar poles emisiones, modelu de llingua, proponer modelos de programación, etc.”

P’acabar, la XDLA quier felicitar a estes dos formaciones “por defender una presencia mayor del nuestru idioma en RTPA, dalgo que choca cola actitú de los otros tres partíos con representación parllamentaria. Nesi sentíu, nun ta de más recordar que los grupos que nun fixeron observaciones sobre la presencia del idioma na RTPA entá van tener otra oportunidá de facelo, en pasando’l Plenu de Totalidá, una y bones el PP anunció que nun va refugar el debate sobre la Llei. Ye de reseñar que RTPA ye un mediu públicu que, d’alcuerdu cola llexislación vixente, tien qu’usar y fomentar l’usu del idioma, amás d’atender al interés xeneral de la sociedá asturiana. Naide pue negar que la llingua y la cultura propia tienen interés dientro de la nuestra sociedá, dalgo que saben en TPA al ver les audiencies de los sos programes n’asturianu. Por exemplu, los dos programes non informativos de más audiencia del mes de marzu, según la empresa Kantar Media, foron dos n’asturianu. Por eso, la dexadez de funciones d’estos otros tres partíos pareznos un despreciu a la llexislación autonómica, a los medios de comunicación públicos, al deséu de la sociedá asturiana y la nuestra identidá como pueblu. Quier dicise: un despreciu a Asturies.”