La Universidá quier ser parte de los proyectos pa la transición xusta

Tenemos una oportunidá n’Asturies colos fondos de la transición xusta de la Unión Europea; van movilizase más de 100.000 millones d’euros mientres el periodu 2021-27. La Universidá d’Uviéu quier ser parte d’esos proyectos». D’esta miente, el rector de la institución académica, Santiago García Granda, reclamaba la selmana pasada más protagonismu aprovechando la conocencia acumulada mientres los últimos años.

Y pa ello punxo sobre la mesa sacar rendimientu al Clúster d’Enerxía, Medio Ambiente y Cambéu Climáticu, que potencia la investigación d’excelencia empobinada al desenvolvimientu tecnolóxicu y l’innovación en sectores estratéxicos pa la rexón, como’l diseñu y la fabricación de bienes d’equipu y l’industria amestada a les enerxíes llimpies y l’eficiencia enerxética.

El rector recordaba que’l Clúster d’Enerxía, Medio Ambiente y Cambéu Climáticu da soporte a la Plataforma europea de rexones del carbón en transición, «ya impúlsense proyectos d’I+D+i de transición sostenible y enerxética. Esa entidá tamién ufierta un foru d’intercambiu de bones práctiques de les rexones de la Unión Europea con una redolada industrial y mineru asemeyáu. Ende tán les cuenques mineres (del Caudal y del Nalón)», dixo.

García Granda indicaba que la Universidá collabora, «tolo intensamente que se nos dexa col Gobiernu rexonal», na definición del Plan estratéxicu rexonal de transición enerxética y reactivación, «porque n’este en marcu, n’Asturies, va ser imprescindible un procesu de tresformamientu industrial y enerxética, nel que se potencien bien los recursos endóxenos y plániense los nuevos en función del territoriu, apostando pol almacenamientu d’enerxía, les anovables, les materies primes y el caltenimientu del patrimoniu industrial son exes que tenemos qu’encetar».
Investigación

El rector faía estes declaraciones na inauguración ‘online’ de les terceres Xornaes d’Investigación, Desenvolvimientu ya Innovación n’Inxeniería Civil que sirven pa potenciar el campus de Mieres. Unu de los invitaos yera l’alcalde, Aníbal Vázquez, quien escuchó les palabres del responsable de la Universidá.