La UE quier desaniciar les drogues sintétiques de la cai

La Comisión Europea quier desaniciar les drogues sintétiques, les nomaes como ‘euforizantes llegales’ que tan espardiéndose abondo pola falta de regulación y control de les mentaes sustances, qu’imiten otres drogues como la cocaína y l’éxtasis.

L’oxetivu que se plantega la COmisión ye “reforzar la capacidá” de la UE pa retirar rápido del mercáu les “nueves sustances psicoactives que son utilizaes como alternativa a otres drogues”, sigún dixo nuna rueda de prensa’l voceru comunitariu, Olivier Bailly, que dexó bien nidio que les nueves midíes nun van comprometer l’usu d’estes nueves sustances “pa fines industriales o comerciales”.