La Tertulia Malory escueye’l meyor llibru n’asturianu del 2011

La Tertulia Malory, de L’Entregu, escoyó como meyor llibru n’asturianu de tolos editaos nel 2011 el poemariu “La ñeve del cuquiellu”, del escritor Xabiero Cayarga. El xuráu tuvo formáu polos escritores Xulio Arbesú, José Luis Rendueles, Pablo Rodríguez Medina, Roberto Corte, Chechu García y Henrique G. Facuriella, que fallaron el premiu nuna sesión especial de la tertulia celebrada en Peñamayor el 9 de xunu del 2012. El xuráu destacó nel acta del fallu «la claridá de los versos, la frescura y el tempo poéticu, a la par que s’atoparon nel llibru munchos momentos de llectura rellumantes».

El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu nuna fecha tovía ensin determinar. Amás, el colectivu lliterariu con sé en L’Entregu va mercar venti exemplares de la obra pa ofrecer como regalu protocolariu nos actos organizaos o onde participe la Tertulia Malory.

Esta ye la primer vez que’l grupu concede esti premiu, col que los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n’asturianu. Los entamadores consideren que yera «pernecesariu» un premiu d’estes característiques nel ámbitu de la lliterartura asturiana tanto poles posibilidaes de visibilidá y proyección social que-y pue dar a la creación lliteraria como pola contribución al prestixu del asturianu como llingua.

El premiu al meyor llibru del añu ye un pasu más nel trabayu de la Tertulia Malory nel terrén de la normalización social del asturianu y enmárcase nel desarrollu de proyectos como la revista Reciella Malory, de la que salieron hasta la fecha cinco númberos. Entrambes iniciatives cumplen colos fines de la tertulia, qu’inclúin l’usu del asturianu como vehículu d’espresión cultural y la difusión de los productos culturales fechos na llingua propia.

Xabiero Cayarga (Cangues d’Onís, 1967) diose a conocer nes lletres asturianes en 1994 con El boleru de Xabel, novela que ganó’l Premiu de Narraciones de l’Academia de la Llingua Asturiana. Ye autor de los llibros de cuentos Les gatileres del cielu, Güelgues sobre’l llagu y A flor de piel. Amás, la so narrativa aparez recoyida na Antoloxía del cuentu asturianu contemporaneu, d’Ánxel Álvarez Llano, y en Muestra de nuevos narradores, de Ramón Lluís Bande. Nel 2006 publicó Trastes de bufarda, novela cola qu’abrió un silenciu editorial de cinco años, rotu nel 2011 con El sol negru de Wewelsburg(Trabe), un títulu que tien como protagonista a Marcial, un asturianu emigráu que se xunta con un grupu de neonazis que tien como base’l castiellu que da nome al llibru.

Como poeta, Cayarga ye ún de los autores asturianos más destacaos, con premios como’l Xuan María Acebal o’l Teodoro Cuesta, que recibió pela segunda vez gracies precisamente a La ñeve del cuquiellu, el so llibru de poesía más recién. La residencia, dende hai años, del autor n’Alemaña dexa un posu apalpable nel llibru, un tonu seriu, llimpiu y claru non faltu d’ironía y hasta humor, como cuando fai referencia a les ilusiones de la mocedá sobre la construcción d’una identidá nacional p’Asturies.

Entrevista con Xabiero Cayarga asoleyada en 2011 onde fala del poemariu premiáu agora