La Televisión Dixital Terrestre (TDT) algama en Carreño una cobertura averada al 100%

Fízose una inversión de 148.258 euros pa dixitalizar los trés centros reemisores del conceyu: Candás, Pervera y Yebio. Dos de los sos trés centros yá tán apagaos, Pervera y Yebio, el de Candás va tar n’abril d’esti añu, asina que dos centros yá emiten namas la señal dixital. El Direutor Xeneral instó a la población a que “nun espere al apagón xeneralizáu de la señal analóxica’l 3 d’abril porque nel conceyu yá hai cobertura, y tamién s’apagaron yá dos centros pa comprobar los posibles problemes y solucionalos cuanto enantes”.

La inversión fecha en Candás forma parte d’un total de 24 millones pa la dixitalización de tola rexón y llograr asina la cobertura del 99% de la población, que yera’l porcentaxe que veía enantes la televisión analóxica. Quedaría un 1% de la población, espardíu enforma, que nun tenía accesu a la televisión analóxica y qu’agora sí va tener accesu a la dixital, pos punxeron en marcha un proyeutu pa solucionar esti inconveniente llamáu “TDT satélite pa zones rurales y aislaes”, p’aquellos a los que nun-yos llegue la cobertura vía terrestre, y destinaron un millón d’euros a tala fin dando subvenciones de 250 euros pa que los usuarios puean costear l’equipamientu y adoptar esti sistema alternativu. Pérez Cueto fixo alcordanza de qu’esiste un teléfonu a disposición de los ciudadanos pa informase de la opción satelital y solicitar les sovenciones, el 902 830 830.

Nestos momentos, yá se dixitalizaron 264 centros d’un total de 360 llogrando una cobertura n’Asturies del 97’5%. Esti númberu tan altu de centros ye frutu de les necesidaes propies de la rexón, al tener una xeografía complicada y un hábitat espardío, con núcleos de población pequeños y cases repartíes de forma irregular, lo que fixo que fora preciso colocar un 10% de los centros reemisores del total del país nesta rexón.