La televisión castellano-lleonesa entama la emisión d’un informativu en lleonés

Mientres la presencia de la nuesa llingua na TPA lleva más de dos años ensin medrar y ensin cuntar con programación de calter informativu, en Lleón, y tres d’un alcuerdu de la Conceyalía de Cultura Lleonesa de la capital del territoriu cola televisión autonómica (TVCyL), esta última va cuntar con un informativu n’asturlleonés, el “Xornal Informativu en Llingua Llïonesa”.

El programa, con una duración de diez minutos, va emitise los sábados a les 20.15 hores y los llunes a les 10.30 hores al traviés de la canal 8 de TVCyL.

La televisión encárgase de la parte técnica y periodística y la Conceyalía de les tornes al lleonés. El conceyal d’Educación, Nueves Tecnoloxíes y Cultura Lleonesa del Ayuntamientu de Lleón, Abel Pardo, señaló qu’esti alcuerdu ye “ampliamente satisfactoriu pa les dos partes, al llograr un programa con una altísima calidá técnica y llingüística que vien a satisfacer una demanda de la sociedá que reivindicaba que la llingua lleonesa tuviere presente nos medios de comunicación”.

El programa va estendese hasta finales d’añu, aumentando la cuota de lleonés, “si l’audiencia respuende”.