La Tarrancha adelanta un tema del so discu nuevu

La Tarrancha llanza un nuevu single a la rede. Como yá ficiere’l grupu va unos años, enantes dasoleyar el so primer discu-maqueeta, La Tarrancha llanza un single al traviés de la rede como carta de presentación del so próximu discu, “Mezigaysuka”. “Somos” ye’l titulu d’esti senciellu, una tema con aires punk-folk que parte de la base d’un cachu d’una muñeira asturiana conocida pol nome de Muñeira de Bargáz. “Ye un cantar a nós mesmos, los asturianos y a lluchar , un cantar cargáu de rabia, pero de sentimientu”, espliquen.

Al contrariu de lo que podríemos pensar, non tol discu que ta a piques de salir va nesa linia, yá que ye “un discu variáu, cargáu d’influencies musicales de gran parte del planeta”, comenten dende’l grupu. La Tarrancha dende un principiu creo un autocuñu par definir el so estilu musical, Mecigayu Ska; una mezcolanza d’influencies sonores que partiendo del los ritmos xamaicanos del Ska y el Reggae van pasando pola música tradicional asturiana a la bretona, de soníos mas folkis a a aires llatinos, del funk al ragga… con temes dende bien llimpios a otros cargaos de distorsión y aire más roqueru. Un conceutu musical ventureru, alloñáu de complexos y de convencionalismos comerciales.

“Somos”, al igual que’l so próximu discu, ta grabáu en Tutu Estudios de Corvera. Tratase d’un discu autu-producíu qu’al igual que tola so obra, lleva llicencia semillibre Creative Commons, un formatu llegal fuera l’entramáu de la S.G.A.E., polo que la so música pue ser compartida de forma gratuita pela rede ensin nenguna torga llegal. Tamién ye una aliciente pa los promotores de conciertos y festivales, yá que nel casu de contratalos nun tienen que pagar nengún tantu per cientu a la S.G.A.E.

Sentir el tema na rede