La Semiente celebra los resultaos de la Campaña de Recoyida y Repartu de Llibros

L’Asociación de SMRA celebra que superáronse los 160 estudiantes beneficiaos por esta campaña. A lo que hai que sumar los llotes depositaos nel Centru d’Educación d’Adultos del Nalón.

Un añu más, y van cuatro, finó la Campaña de Recoyida y Repartu de Llibros y Material Escolar llevada a cavo pol Centru Social Autoxestionáu La Semiente, de L’Entregu. Si l’añu pasáu atendíen a mas de 120 estudiantes apurriéndo-yos llotes de llibros y material escolar, anguaño superáronse los 160 estudiantes beneficiaos por esta campaña. A lo que hai que sumar los llotes depositaos nel Centru d’Educación d’Adultos del Nalón. Anque nun se repartieron munchos llibros ante los continuos cambeos que presenten dacuando’l conteníu de los llibros y les nueves reformes aplicaes pola LOMCE, el pesu fuerte de la campaña recayó como siempre na repartida de los llotes de material escolar. Dichos llotes tán formaos por llapiceros, bolígrafos, retuladores fosforitos, colores, escaches, pegamentu, tisories, tipex, riegla, escuadra, cartabón, tresportador, llibretes ,folios… y en dellos casos tamién se pudieron repartir carpetes, mochiles y axendes donaes por otros mozos o llibreríes.

La cantidá recaldada ya íntegramente gastada na campaña foi de 1418,23 euros. Dicha cantidá débese al esfuerzu y la solidaridá vecinal, a la que dende La Semiente quieren dar les gracies y la reconocencia que se merez: “D’esa cantidá, 419,23 euros fueron recaldaos nes huches solidaries puestes en distintos establecimientos de L’Entregu y otros pueblos del valle. El restu (otros 999 euros) súmenlo la recaldación fecha por La Semiente na barra de La Foguera de San Xuan, donaciones anónimes de persones, dalgún grupu de profesores y tamién a la donación d’organizaciones públiques como Somos (Samartín) que donó 300 euros, y l’Asociación Cultural Folixa Ástur que donó 200 euros. L’añu pasáu solo nes huches yá se recaldaren 600 euros, pero anguaño les donaciones fueron mayores polo qu’entá asina superóse la cantidá total del cursi pasáu”.

Dende La Semiente apuesten por distribuyir el gastu en material nos pequenos comercios de la zona. Apostando por contribuyir a la so supervivencia, tan difícil tamién nestos momentos, y col agravante de nun poder competir coles grandes superficies. Seguro que nun lleguemos a toes, pero intentémoslo.

Por eso, l’asocación da les gracies a los establecimientos qu’emprestaron la so collaboración asitiando les huches solidaries; Los chigres El Ochobre, El Coto, El Florida, El Zamorano, El Restallu, la Churrería de L’Entregu, , la tienda El Fielatu, Casa Manola, Kiosku de Carmén, Café Domoe, Peluquería Marifé y Llagar L’Allume.