La revista El Summum algama’l so númberu 17 nuna nueva entrega con guiños a l’actualidá cultural del veranu

La revista El Summum acaba de publicar la so última entrega, el númberu 17 d’una publicación dedicada a la reflexón y l’amuesa de les propuestes creatives más actuales dende una mirada al marxe de les corrientes mayoritaries del mercáu. Música independiente, cine, fotografía, arquitectura, lliteratura y conciencia crítica de la realidá formen el conteníu d’esti nuevu númberu nel que tamién hai sitiu pa referenciar l’actualidá cultural del veranu n’Asturies.

La revista ábrese con una interviu al grupu holandés Mist, qu’apocayá publicaron el so últimu discu “Bye, bye” col sellu asturmadrilanu Astro. Una entrevista al fotógrafu Kim Manresa, autor de la esposición “Escueles del mundu” que se puede contemplar nos centros municipales de Xixón hasta setiembre. L’actualidá musical del veranu ta presente nesti númberu 17 con artículos de Manolo Abad sobre Little Richard y Jon Spencer Blues Explosion, dos de les referencies del Crosroad Festival y de Lino Veiguela sobre Van Morrison.

Una reflexón sobre la identidá arquitectónica del Bilbao urbanu de Garikoitz Gamarra y un artículu d’Álvaro Arroba y Daniel V. Villamediana sobre “La representación de lo real” nel cine, constitúin la parte dedicada al ensayu del nuevu Summum. Xunta estos artículos, trabayos lliterarios y críticos de firmes avezaes nesta publicación asturiana como les de Chus Fernández, Hilario J. Rodríguez, Ovidio Parades o Ramón Lluis Bande. Otros autores tán presentes na revista como Eva Vaz, Jaime Priede o Henrique G. Facuriella.

Les lletres del duo de hip hop Stoned Atmosphere, autores del recién trabayu discográficu “Issue 04” cubren l’espaciu poéticu de El Summum númberu 17 y la imprescindible recordanza del últimu discu de Dixebra: “Ensin novedá” ye un nuevu guiñu al referente cultural asturianu dende’l qu’esta publicación tenta arrepresar la realidá creativa más inquieta del mundu.